SARANDث
Mbytja e varkës, Policia e Shtetit sqaron ngjarjen, identifikon të mbijetuarit
Ora 23:25 - Policia e Shtetit ka reaguar menjëherë për ngjarjen e rëndë të ndodhur në Butrint. Sipas saj gjithçka ka ndodhur në liqenin e Butrintit, mbas parkut, tek ish-peshkimi, kur një grup i përbërë prej 20-25 personash në tentative për të kaluar në bregun tjetër të liqenit në vendin e quajtur “Bufi”, për t’ju shmangur postobllokut të shërbimeve të Policisë Kufitare të dislokuara pranë vendit të quajtur “Lundra”, duke përdorur 2 varka druri, kanë tentuar të kalojnë nga Butrinti në Xarrë. “Nga hetimet e deritanishme rezulton se barka e përmbysur ishte prej druri, dhe përdorej nga peshkatarët për gjuetinë e midhjeve, dhe në të kanë hipur 13 persona,e të cilët kishin si destinacion kalimin e kufirit tokesor nga fshati Xarrë e më tej në Konispol për të kaluar në Greqi”, tha Klodian Branko, zëndhënësi i Policisë së Shtetit.
Deri tani në polici janë shoqëruar 24 persona për tu intervistuar në lidhje me ngjarjen, mes tyre shtetasit Ahmet Bushi 52 vjec nga Qaf Gjashta dhe Ilir Meta 33 vjec nga Vrina, të dyshuar respektivisht si pronari dhe drejtues i varkës së përmbysur.
Policia e Shtetit konfirmon se personat e mbijetuar janë, Skëndër Ruçi nga Fieri, Elidon Manaj nga Fieri, Brunilda Manaj nga Fieri, Gerti Duraj nga Fieri, Erion Duraj nga Fieri, Marsid Mita nga Lushnja, Elton Mehmeti nga Cërriku, Taulant Duraj nga Fieri, Artan Cobaj nga Fieri, Sajmir Xhekalili nga Mati, Qemal Stashkollari nga Lushnja, Valbona Senja nga Elbasani, Agim Shermadhi nga Klos Elbasan, Indrit Azisaj nga Fieri, Fatjon Sene nga Mollasi i Elbasanit, Ardian Lazaj, nga Mallakastra, Lavdosh Kuca nga Tepelena, Vambaster Gjinushi nga Tepelena, Klodian Calliu nga Durrësi, Sokol Mali nga Pezë Helmes Tiranë, Maringlen Hoxha nga Fieri, Denis Zema nga Lushnja si dhe Dritan Jaho i cili beri edhe identifikimin e dy viktimave. Gjithashtu mësohet se këta persona janë shoqëruar edhe në polici për tu marrë në pyetje në lidhje me ngjarjen.
Policia sqaron itinerarin e varkës nga Butrinti në Xarrë dhe rrethanat e mbytjes
Ora 22:29- Dëshmitë e të mbijetuarve, deklarojnë se dy varka prej druri kane tentuar te bejne rrugen nga Butrinti për në Xarrë.
Njera nga varkat ka mundur te kaloje ne anen tjeter 10 persona. Ndersa varka e dyte e cila ka patur ne bord 13 persona dhe timonieri i varkës, gjithsej 14 persona pasi ka bere 60 metra nga bregu eshte permbysur. Pikërisht ka qenë ky momenti kur varka është mbingarkuar, ka futur ujë dhe menjëherë është përmbysur. Në këtë varkë kanë qenë edhe dy viktimat, foshnja 3 muajshe Klara Jaho dhe nëna e saj 22 vjeçare Elvira Jaho.
Këto të dhëna janë konfirmuar edhe nga Policia e Sarandës të cilët thanë se në komisariat janë arrestuar pronari i barkës Ahmet Bushi dhe timonieri i varkës. Po kështu mësohet se 22 të mbijetuarit pasi kanë marrë ndihmën e nevojshme mjekësore, janë marrë në pyetje nga policia në lidhje me ngjarjen tepër të rëndë.
Po kështu korrespondentët e “News24” në Sarandë bëjnë të ditur edhe dy emra të tjerë të të mbijetuarve të cilët janë Marsid Mido 18 vjeç dhe Denis Zenio 17 vjeç, të dy nga Bubullima e Lushnjes. Ndërsa bëhet e ditur se e mbijetuar është edhe një grua shtatëzënë e cila ndodhet në maternitetin e Sarandës.
Mbytet varka me 24 persona, identifikohen 2 të vdekur dhe 5 të mbijetuar
Ora 21:30 - Shefi i rendit të Komisariatit të Sarandës, konfirmon se aktualisht ngjarja e rëndë në Liqenin e Butrintit këtë mbrëmje të së dielës ka shënuar 2 viktima dhe 22 të mbijetuar. Ndërkohë mësohet se në varkë ndodheshin plot 24 persona. Kjo ngjarje e rëndë në Liqenin e Butrintit ka prekur së tepërmi familjen Jaho nga fshati Lapardha e beratit ku një foshnje vetëm 3 muajshe dhe nëna 22 vjeçare ka gjetur vdekjen, ndërsa ka mundur të shpëtojë babai i foshnjes dhe bashkëshorti i gruas Dritan Jaho, 27 vjeç. Policia ka identifikuar dhe dy viktimat e kësaj tragjedie që janë Elvira Jaho dhe vajza e saj Klara Jaho 3-muajshe. Ndërkohë korrespondenti i “News24” në Sarandë bën të ditur emrat e disa të mbijetuarve të cilët janë Dritan Jaho nga Berati Sokol Ibrahimi nga Tirana, Mariglen Hoxha nga Fieri, Klodian Calliu nga Durrësit Endrit Hazizaj nga Fieri.
Konfirmohet se në varkë kanë qenë 24 persona që janë nisur nga Liqeni i Butrintit dhe kishin për qëllim të kalonin klandestin në Greqi.
Në komisariatin e Sarandës janë 22 persona që janë duke u pyetur për hetimet mbi drejtimin e varkës e cila ka patur një mbingarkesë të madhe gjë e cila mësohet të jetë edhe shkaku i mbytjes së varkës.
Përmbytja e varkës në Sarandë, mbërrin në spital i mbijetuari i parë
Ora 20:40 - Vetëm pak minuta më parë ka mbërritur në Spitalin e Sarandës i mbijetuari i parë i tragjedisë së sotme në Liqenin e Butrintit. I mbijetuari quhet Dritan Jaho dhe mesohet të jetë babai i foshnjes 3 muajshe dhe burri i gruas së mbytur.
Sipas korrespondentit të “News24” në Sarandë, mësohet se ai ka mbërritur në gjendje shoku, i plagosur në krahë dhe këmbë, duke kërkuar fëmijën dhe gruan. Familja Jaho eshte nga fshati Lapardha i Beratit. Ne nje lidhje telefonike me "News24", drejtori i Spitalit te Sarandes ka deklaruar se cifti Jaho kishte pak kohe qe ishin martuar. Dritan Jaho mesohet te jete 25 vjec, gruaja e tij e mbytur 22 vjec dhe foshnja e tyre 3 vjec.
Aktualisht ai është duke u mjekuar nga mjekët e spitalit të Sarandës të cilët po mundohen të qetësojnë gjendjen e të mbijetuarit i cili përveç gjendjes së shokut dhe tronditjes, ndodhet jashtë rrezikut për jetën.
Sarande, mbytet varka me 20 persona, dyshohet per 3 te vdekur
Ora 20:26 - Një tragjedi e vërtetë ka ndodhur sot rreth orës 20:00 në liqenin e Butrintit ku një varkë me 20 persona është përmbytur. Nga kjo dyshohet se ka gjetur vdekjen një grua me foshnjen e saj 3 muajshe dhe një djalë 17 vjeçar.
Sipas të dhënave të para 20 personat që ndodheshin në varkë do të niseshin klandestinë për në Greqi por baticat dhe zbaticat në këtë orë, ka sjellë që varka të përmbytet duke sjellë vdekjen e menjëhershme të një nëne dhe foshnjes së saj vetëm 3 muajshe, si dhe një djali 17-vjeç.
Burimet e policisë thonë se ende nuk bëhet e ditur numri i saktë i viktimave të kësaj tragjedie, ndërkohë që në vendin e ngjarjes kanë mbërritur 8 ambulanca dhe forca të shumta të komisariatit.
Dhimitraq Lapa, Drejtori i Spitalit të Sarandës, në një lidhje direkte me “News24” bën të ditur se aktualisht janë konfirmuar 3 të mbyturit, një grua dhe një vajzë 3 muajshe si dhe një djalë 17 vjeçar. Lapa ka deklaruar se në vendin e ngjarjes ndodhen të katër ambulanca të shoqëruar me mjek dhe infermier.
Sipas drejtorit të Spitalit të Sarandës mësohet se numri i viktimave mund të jetë më i madh dhe se nga momenti në moment pritet të shtohet numri i të mbyturve. Ende nuk dihet fati i personave të tjerë të cilët ndodheshin në varkën e mbytur, ndërsa në vendin e ngjarjes ndodhet grupi i shpëtimit dhe mjekë të shumtë.
(a.s/Balkanweb)
...
