Kryeministri Sali Berisha në mbledhjen e sotme të Këshillit Kombëtar për Rregullimin e Territorit u shpreh se ndërtimi i HEC-ve në është shndërruar në gjenerator zhvillimi. Ai tha se kjo ndihmon në rritjen e numrit të të punësuarve edhe të zonat më të thella të vendit.
“Sot ne miratojmë ndërtimin e disa HEC-ve që do të punojnë mijëra qytetarë. E vërteta është se ndërtimi i HEC-ve në mbarë vendin është shndërruar sot aktualisht në një gjenerator të fuqishëm të punësimit të qytetarëve shqiptarë edhe në zonat më të thella të vendit, por duhet të pranojmë se është ecur edhe drejtimin kryesor të zhvillimit të qëndrueshëm të Shqipërisë. Vendimtar në këtë proces është qëndrueshmëria e zhvillimit. Leksioni më i madh i krizës që mund të nxirret është se ka vetëm një rrugë të sigurt për parandalimin e tyre dhe kjo rrugë është zhvillimi i qëndrueshëm”- tha Berisha.
Në fjalën e tij kryeministri u ndal edhe në pasuritë ujore që ka vendi ynë. “Mbledhja nuk ka sot vetëm energjinë, por miratohen disa vendime me një rëndësi shumë të madhe për zhvillimin e turizmit në brigjet e komunës së Ishmit, e cila ka territore turistike që kanë tërhequr vëmendje, ose kanë pritur edhe perandorë. Ne shekullin 19, Maksimilaani i parë, që u bë më pas perandori i Meksikës kaloi ditë të tëra në Kepin e Rodonit, bashkë me suitën e tij. Natyrisht me së shumti për gjah, por ai ishte turizmi i kohës. Tani komuna e Ishmit po zhvillon format bashkëkohore të turizmit dhe ka një veçanti sepse në një distancë të shkurtër ajo gërsheton dy klima, atë të bregdetit me klimën malore. Pra shqyrtohen disa projekte në të cilat do punësohen me mijëra qytetarë. Sot shqyrtojmë problemet që kanë të bëjnë me nevojat jetike të zonës së Orikumit. Bëhet një investim shumë i rëndësishëm prej rreth 16 milionë dollarë për furnizimin me ujë”,- deklaroi Berisha.
/Shekulli Online/Përgatiti: E.Sh/
