Opozita bllokon foltoren, Basha: Po bëheni gati për grusht shteti
Ndërkohë që protesta ka vazhduar para parlamentit, Kryetari i parlamentit Gramoz Ruçi ka hapur seancën plenare. Basha i cili e mori fjalën i pari nga opozita i kërkoi mazhorancës mos të votojë zgjedhjen e kryeprokurorit pasi sipas tij Kushtetuta e ndalon të zgjedhë një forcë e vetme kryeprokurorin.
“Sot është një ndër ditët më dramatike dhe të rënda për demokracinë 27-vjeçare, një ndër ditët më të rënda për shqiptarët. Në dhunim flagrant të Kushtetutës mazhoranca po tenton të kap prokurorin, – tha Basha. – Në mënyrë tinëzare po bëheni gati për një grushtë shteti. Kushtetuta e Shqipërisë dhe reforma e drejtësisë ja ndalon një force politike emërimin e një kryeprokurori. Të hiqni duart nga pushteti i drejtësisë. Por ju jeni të vendosur për të shkelur Kushtetutën për të mbrojtur pasurit tuaja, Ju kërkojë në emër të Kushtetutës të tërhiqeni, bindeni popullit ose mbani pasojat” – tha Basha.
Ndërkohë që Lulzim Basha ka përfunduar fjalën në Kuvend pas tij ka kërkuar fjalën edhe deputeti i PD-së Sali Berisha, por kjo gjë nuk është lejuar nga kryeparlamentari Ruçi. Në foltoren e parlamentit ka pasur edhe konfrontime dhe përplasje fizike mes deputetëve të opozitës dhe gardës.
Ndërkohë, forca të shumta policie janë vendosur para Kuvendit për të shmangur incidentet e mundshme.
Mazhoranca ka paralajmëruar hedhjen në votim të tre emrave për postin e kryeprokurorit të përkohshëm. Kandidaturat janë Ferdinand Elezi, Arta Marku dhe Ermira Tafani, të vetmit që sipas Komisionit të Ligjeve plotësonin kriteret nga 7 kandidatët fillestarë.
(gazeta-Shqip.com)