Ish-kreu i Gardës së Republikës, Ndrea Prendi dhe gardisti Agim Llupo janë shpallur të pafajshëm. Gjykata e Tiranës ka dhënë sot vendimin për ngjarjen e “21 janarit: ku mbetën të vrarë katër protestues.
Gjyqtari Besnik Hoxha rrëzoi akuzën e prokurorisë për vrasje me dashje në rrethana cilësuese, akuzë për të cilin kishte kërkuar 23 vjet për Prendin dhe 25 për Llupon.
Pas vendimi gjykata urdhëroi lirimin e Prendin nga "arresti shtëpiak" dhe lirimin e Llupos nga burgu.
Prokurori i çështjes deklaroi se Ndrea Prendi dhe Agim Llupo kanë qëlluar direkt mbi protestuesit e vrarë në protestë.
Ish-kreu i Gardës së Republikës Prendi akuzohej për vrasjen e protestuesit Faik Myrto ndërsa gardisti Llupo për vrasjen e Hekuran Dedës dheZiver Veizit.
Faktet e zbuluara nga prokuroria dëshmojnë se, punonjësit e Gardës së Republikës kanë qëlluar mbi 500 herë nga plumbat e të cilëve mbeten katër të vrarë dhe shtatë të plagosur.
Djali i Faik Myrtajt: Berisha do përballet me gjithë fisin tim
Pak minuta pas vendimit të gjykatës për shpalljen si të pafajshëm të akuzuarve për vrasjen e protestuesve të “21 janarit”, ka reguar një prej familjarëve të viktimave.
Renato Myrtaj, djali i Faik Myrtajt, është shprehur se vendimi është “varrosje për së gjalli” për atë. Renato në një lidhje telefonike për “A1 Raport”, ka shtuar se një vendim të tillë e priste pasi “përderisa z.Kryeministër dha urdhër edhe do t’i mbronte”.
Por ai ka theksuar se nuk mbaron me kaq. Berisha tha ai, do të përballet jo vetëm me atë por të gjithë fisin e tij dhe të tre viktimave të tjera të “21 janarit”.
“Nuk do përballet vetëm me mua po me të gjithë fisin tim, aleksi Nikës, Ziver Veizit dhe Hekuran Dedës. Vetëm po na vrau të gjithëve vetëm atëherë do të gjejë rehat”, u shpreh djali i Faik Myrtajt.
Xhaxhai i Aleks Nikës: Drejtësia do vendoset në vend
Mark Nika, xhaxhai i Aleks Nikës, në reagimin e tij pas vendimit të gjykatës është shprehur se do të vijë dita kur do të vendoset drejtësi për “21 janarin”.
“Nuk është trim Ndrea, ne do ta gjejmë. As Saliu nuk është trim. Koha është e gjatë. Edhe në televizion kur flet (Berisha), flet sikur është Skënderbeu i Shqipërisë. Unë e njoh personalisht t’i vijë turp, ai duhet të kërkojë falje”, tha ai në një prononcim për “A1 Raport”.
/Shekulli Online/Përgatiti: F.S./