TIRANE - Rikthehet në skenën e Teatrit të Operas dhe Baletit, pas shumë vitesh, opera shqiptare "Lulja e Kujtimit". Kjo vepër, e cila është vënë për herë të parë në vitin 1961, është kompozuar nga Kristo Kono sipas romanit të Foqion Postolit.
"Lulja e Kujtimit" karakterizohet nga dy linja, ajo lirike e ajo patriotike. Për regjisorin Mehmet Xhelili dhe dirigjentin Eno Koço, vepra vjen e ripërpunuar, por asaj sipas tyre nuk i është prekur thelbi. Opera ka në qendër dashurinë e dy të rinjve, Olimbisë dhe Dhimitrit, e cila nuk flet vetëm për lidhjen e tyre, por edhe për dashurinë që ata kanë për atdheun e tyre.
Në rolet kryesore interpretojnë Armando Likaj dhe Ramona Tullumani. Disa prej këngëtarëve lirikë do të mbajnë të veshur kostumet që janë përdorur në vitin 1961. Shfaqja do të jepet në datat 28, 29, 2 dhe 3 mars, në skenën e Teatrit të Operas. Libreti i operas është shkruar prej shkrimtarëve Andon Mara dhe Aleko Skali. Autorët e libretit përgjithësisht i kanë qëndruar besnikë subjektit, karakterit të personazheve dhe frymës patriotike të dramës dhe romanit.
Opera "Lulja e Kujtimit" është padyshim një nga veprat më të rëndësishme të kompozitorit tonë të njohur, Kristo Kono (Artist i Popullit) dhe laureat i اmimit të Republikës. Në këtë opera janë pasuruar dhe kanë gjetur një zhvillim më të plotë shumë karakteristika të muzikës së kompozitorit. Ajo është mjaft e pasur në melodi dhe përshkohet nga një frymë lirizmi, që shpeshherë kalon në momente dramatike dhe patriotike.
(er.nu/GSH/BalkanWeb)