TIRANE - Qytetarë të Tiranës i janë bashkuar sot në mbrëmje rreth orës 19:30 thirrjeve të shoqërisë civile për të protestuar kundër gjakmarrjes. Të indinjuar për vrasjen e Marias 17-vjeçare në Dukagjin të Shkodrës pak ditë më parë, qytetarët ndezën qirinj dhe u lutën në heshje për shpirtin e vajzës së re, në Bulevardin para Piramidës në kryeqytet. Në tubimin e përshpirtshëm ka marrë pjesë edhe Ambasadori amerikan në Tiranë, Aleksandër Arvizu.
Qytetarë dhe aktivistë mbanin në duar foton e Marias, 17-vjeçares së ekzekutuar pak ditë më parë në emër të gjakmarrjes bashkë me gjyshin e saj 70-vjeçar në Dukagjin ndërsa të dy po punonin në një arë.
Lëvizja për “Mendim të Lirë” apeloi për ndërgjegjësim të shoqërisë dhe strukturave shtetërore për ndaljen e fenomenit të vrasjes për gjakmarrje.
“Maria u vra në emër të gjakmarrjes, ky rit i kobshëm vazhdon të marrë edhe sot jete njerëzish, dhe mbetet më i rrezikshëm se shekuj më parë. Gjakmarrja tashmë i ka dalë duarsh si kanunit edhe shtetit, pasi nuk fal më as jetën e fëmijëve dhe të grave”, tha gjatë protestës gazetari Mentor Kikia, përfaqësues i forumit “Mendimi i Lirë” që organizoi protestën.
“Ne nuk jemi këtu për të dhënë receta juridike se si mund të parandalohet ky fenomen, por jemi këtu për t’i thënë strukturave shtetërore se kjo plagë e shoqërisë shqiptare meriton më shumë vëmendje. Ne nuk do të ndalim këtu protestën tonë. Ne do të vijojmë të ngremë zërin e protestës derisa të shohim reagimin e duhur ndaj parandalimit të gjakmarrjes”, tha Kikia.
Burimi:Shqiptarja.com
dhe te mendosh se sa familje te tjera jane te ngujuar per shkak te gjakmarrjes....