Turi i falënderimeve dhe inaugurimeve të Kryeministrit Berisha vijon në Vlorë, qark në të cilin koalicioni i tij fitoi pesë mandate ndaj shtatë të PS-së. Kreu i ekzekutivit inauguroi fillimin e punimeve për konstruksionin e rrugës Peshkëpi – Ura e Drashovicës, një investim me vlerë rreth 87.22 milion lekë, teksa deklaroi se kjo forcë meriton edhe një mandat tjetër pas katër vitesh. “Kështu ne do të vazhdojmë të festojmë fitoren jo me fjalë, por me inaugurimin e rrugëve, ujësjellësve, shkolla, qendrave shëndetësore, të plantacioneve të ullinjve, vreshtave deri në qershorin e vitit 2013, muaj në të cilin ne do të shënojmë fitore tjetër të madhe, të cilën ne e meritojmë. Ne e ndërtojmë fitoren mbi veprat tona, mbi premtimet dhe fjalët tona”, theksoi më tej kreu i PD-së. “Qeveria e mandatuar është e vendosur që në këto katër vite të investojë në Vlorë më shumë se në 20 vitet e shkuara të marra së bashku. Në këto katër vite Vlora do të njoh zhvillimet më të mëdha, parkun industrial dhe një prej porteve më gjigante në Mesdhe. Ndërkohë ne mbetemi të vendosur të mbështesim fermerët e Vlorës, të financojmë çdo rrënjë ulli, çdo dru frutor apo vresht të mbjell prej tyre, sikundër do të reduktojmë akcizën për sipërfaqet e mbjella”, u shpreh Berisha.
*panorama*
*panorama*