-Katër organizatat më të mëdha mafioze në Itali i kanë lënë mënjanë dallimet dhe luftërat e kontradiktat që kanë pasur mes tyre për të formuar tashmë një "mafie të pestë" në Romë.
Sigurisht, bëhet fjalë për një mafia shumë më të rrezikshme. Ky bashkëpunim mes organizatave është një zhvillim i ri, i rrezikshëm dhe shqetësues për kryeqytetin e Italisë. Jugu i varfër i Italisë ka qenë tradicionalisht bazë e pushtetit dhe e forcës së grupeve mafioze të tilla si Cosa Nostra, Camorra, Sacra Corona Unita apo Ndragheta. Por tani, mafiozët kanë si synim të tyre shtrirjen e pushtetit në Romë dhe rajonin pranë saj të Lazios. Të gjitha këto informacione janë bërë të ditura nga një studim i kryer nga "Libera Informazione" një organ i pavarur që monitoron aktivitetin e mafies. "Kjo mafia e re është më shumë e orientuar dhe e interesuar te biznesi dhe anëtarët e saj kanë vendosur që t‘i lënë mënjanë të gjitha dallimet dhe mosmarrëveshjet që kanë pasur me njëri-tjetrin për t‘i dhënë "jetë" një mafieje të re" thuhet në studim. Me këtë lëvizje në veri, gangsterët mafiozë po reagojnë një mënyrë të re bashkëpunimi dhe lëvizjeje. Në vend që të mbledhin para, si zakonisht, nga restorantet, apo bizneset që ata i mbrojnë siç bëjnë rëndom në Napoli dhe Palermo, mafiozët e rinj janë përfshirë në ndërmarrje shumë më të rëndësishme të biznesit si blerjen e bizneseve dhe ligjërimin e tyre. Në Romë, në fillim të këtij viti ishte shumë tronditës fakti i ndërhyrjes së forcave të policisë në Cafأ© de Paris me dyshimin se kjo kafene e famshme nga filmat e Felinit ndodhej në duart e mafies. Thuhet ndërkohë se mafia ka shtënë në dorë disa prona në sheshet e vjetra të Romës. Ndërkaq aeroporti I Romës Fiumiçino dhe porti i Civitavechias në jug janë shndërruar në pika të trafikut të drogës. Sipas studimit, aktiviteti kriminal në Romë është i të njëjtit nivel si me atë të Italisë së Jugut. Prezenca e nivelit të ulët e mafies në Romë daton në vitet ‘70, kur kumbarët e jugut nisën që të kontrollojnë disa biznese në Romë. Por mafiozët janë bërë shumë më të fuqishëm vitet e fundit duke u shtrirë në prostitucion, trafik droge, pastrim parash e të tjera. Kumbarët italianë janë bërë bashkë edhe me mafiozë nga vende të tjera si nga Kina, Rusia, Shqipëria apo Rumania që operojnë në Romë. Në korrik të vitit të kaluar, policia arrestoi 7 anëtarë të mafies që dyshoheshin se po tentonin të blinin klubin sportive të Lazios.
.