Titulli: Stuhi mbresëlënëse në Saturn (Video)
Super uragani në Saturn
Sonda hapësinore “Cassini”, e mbërritur në orbitën e Saturnit në vitin 2004, solli imazhet e një super uragani të regjistruar në polin verior të këtij planeti.
Syri i uraganit, sipas studiuesve, është me diametër rreth 2 mijë kilometra. Fotot janë shkrepur nga “Cassini” në një distancë prej 420 mijë kilometra. Shkencëtarët thanë se erërat e uraganit shkojnë deri në 150 metër për sekondë.
Uragani është kapur në fazën e avancuar të tij dhe nuk dihet ende se kur është formuar dhe përsa kohë ky uragan do të jetë aktiv.
Mbikqyrja e polit verior të Saturnit ka qenë e pamundur deri në vitin 2004, pasi në momentin e mbërritjes së “Cassini”, ky pol ishte i mbuluar nga errësira, më saktë ishte “stina e dimrit” në planetin që i duhen 29 vite tokësore për të kryer një rrotullim të plotë rreth diellit dhe për të plotësuar ciklin “e katër stinëve”.
Këto janë imazhet e para të shkrepura ditën nga poli verior i këtij planeti, që prej vitit 1981 kur “Voyager-2” shkrepi disa foto teksa kalonte “rastësisht” pranë Saturnit.
“Shkrepëm dy foto kur pamë fenomenin sepse ngjasonte shumë me një uragan tokësor, vetëm se përmasat e tij ishin shumë herë më të mëdha. Ai është ngritur në atmosferën e hidrogjentë të Saturnit dhe ne mendojmë se përmban sasi të vogla uji të avulluar”, thotë Andrew Ingersoll, një anëtar i ekipit të shkencëtarëve të sondës “Cassini” me bazë në Institutin e Teknologjisë në Kaliforni.
Studiuesit mendojnë se “udhëtimi” i uraganit do të jetë drejt qendrës së polit të veriut të Saturnit, e njëjta tendencë që kanë edhe uraganet e formuara në Tokë.
Kjo është hera e dytë që “Cassini” sjell imazhe të një uragani nga Saturni. Në vitin 2006, sonda dërgoi në tokë pamjet e një uragani akoma më të madh. Por këto pamje nuk ishin shumë të qarta për shkak të errësirës në polin verior të planetit./tch
