Love
βeℓℓe â๓e
Disa kilometra larg Tiranës, përgjatë rrugës me ullishte në Farkë, është shtëpia e familjes Haloci. Për Fredin, Majlindën dhe 3 fëmijët e tyre, Keni, Brendon dhe Sendi që në përditshmërinë e tyre jetojnë në një apartament në qendër të Tiranës, kjo është shtëpia që u sjell ndjesinë e lirisë.
“Këtu jemi në një qetësi absolute, në paqe me natyrën. Unë kur vij këtu, nuk merrem me fëmijët pasi ata dalin e luajnë të sigurt në oborr. Në verë nuk shkoj në supermarkete pasi të gjitha i gjej në oborr”, thotë Majlinda.
Shtëpia ka një pozicion të lakmueshëm, e ndërtuar në një kodër mes gjelbërimit të barit dhe pemëve frutore, të fton të kalosh aty sa më shumë kohë të mundesh. Familja kalon 3 muajt e pushimeve të verës dhe rikthehet thuajse çdo fundjavë gjatë stinëve të tjera të vitit, shpesh me miq.
“Qëndrojmë me miqtë deri në mesnatë duke shijuar freskinë në oborr dhe frutat e stinës që i kultivojmë vetë”, shprehet Majlinda.
Shtëpia është arreduar me shumë finesë. Ambienti brenda është mesdhetar, stil neoklasik. Salloni është plot ngjyra, gjallëri e lule. Zbukurimet janë punime dore dhe perdet gjithashtu. Në fasadën e shtëpisë gardhi i ulët me lule rrethuar, e lyer me bojë të bardhë të sjell në mendje fermat amerikane.
Në oborr gjithçka është ndërtuar për të sjellë qetësi dhe shplodhje:“Në arredimin e shtëpisë ka ndihmuar im shoq pasi ai është profesionist.Shtëpia ka kudo lidhje me oborrin.”
Një shtëpi e ndërtuar me shumë dëshirë, pa shumë shpenzime, por që fal shumë lumturi për familjen Haloci. Nëse nuk do të ishte vështirësia infrastrukturore, ata do të jetonin përgjithmonë në të.
TCh