Në ndeshjen e tij të dytë miqësore, ekipi kombëtar shqiptar i femrave, i drejtuar nga ish-sulmuesi i spikatur kuqezi, Altin Rraklli, mundi Maqedoninë me rezultatin e thellë 4-1. Në pjesën e parë shënoi Govori, në minutën e 14-të, ndërsa në pjesën e dytë realizuan edhe Velaj, Berisha dhe sulmuesja e talentuar Ana Baro.Ndeshja u zhvillua në stadiumin e qytetit të Strugës, në orën 13:00. Në ndryshim nga ndeshja e parë e këtij karakteri me Maqedoninë, luajtur në Pogradec (fituar po nga ne, me rezultatin 1-0), ekipi ynë këtë herë ishte fuqizuar edhe me 4-5 vajza të talentuara nga Diaspora. Vajzat kuqezi luajtën me shumë entuziasëm dhe dëshirë për të fituar, duke ia arritur ta bëjnë këtë, madje thellësisht. Ato nuk e vunë asnjëherë në dyshim suksesin, ndërkohë që rezultati mund të kishte qenë edhe më i thellë, shqiptaret mund të kishin shënuar gola të tjerë, duke parë rastet e shumta që humbën. Pas kësaj ndeshjeje miqësore, mund të thuhet se tashmë me ekipin kombëtar të femrave jemi në rrugë të mbarë dhe shpejt do të kemi një ekip serioz, të aftë të na përfaqësojë me dinjitet dhe rezultate pozitive në aktivitetet zyrtare.//Panorama.SPORT
