Titulli: Me 20 Prill 2013 hidhen themelet e Xhamise se madhe ne Tirane
Xhamia e Namazgjasë, sot vihet guri i themelit
Xhamia e Namazgjasë, sot vihet guri i themelitTIRANE- Dita e shumëpritur për mijëra besimtarë myslimanë erdhi. Pikërisht sot vihet gurthemeli i parë për ndërtimin e xhamisë së Namazgjasë. Kryetari i Komunitetit Mysliman, Selim Muça, e ka konsideruar këtë ditë si një ditë historike jo vetëm për besimtarët myslimanë, por për mbarë shqiptarët kudo që janë. "Fillimi i punimeve për ndërtimin e Xhamisë së madhe të Tiranës është një ngjarje historike", - theksoi kreu i KMSH-së, Selim Muça. Projekti i xhamisë është projektuar nga studioja e mirënjohur turke "Hassa". Xhamia e madhe e Tiranës do të ketë katër minare, ku lartësia e secilës prej tyre do të jetë 50 metra, ndërsa kupola, nga arkitektët është parashikuar të jetë 30 metra e lartë.
PUNIMET
Myslimanët e Shqipërisë, në kujtesën e tyre kolektive do të kenë si ditë të shënuar dhe një ndër më të veçantat në këto dy dekadat e fundit edhe datën 20 prill, pra këtë të shtunë, e cila përkon me nisjen e punimeve për ndërtimin e xhamisë së madhe te sheshi i Namazgjasë. Pikërisht sot, kryetari i Komunitetit Mysliman, Selim Muça, ka thënë se do të vendoset guri i parë për ndërtimin e xhamisë së Namazgjasë. "Njoftojmë mbarë besimtarët myslimanë dhe qytetarët që të marrin pjesë në ceremoninë e fillimit të punimeve të Xhamisë së Madhe të Tiranës. Kjo ceremoni do të zhvillohet nesër në orën 10:00, në vendin e quajtur Namazgja, ku dhe do të ndërtohet xhamia e shumëpritur nga të gjithë. Fillimi i punimeve për ndërtimin e Xhamisë së madhe të Tiranës është një ngjarje historike, jo vetëm për besimtarët myslimanë, por për të gjithë shqiptarët kudo që ndodhen". Kështu u është drejtuar qytetarëve dhe në veçanti besimtarëve myslimanë, kreu i KMSH, Selim Muça, duke i ftuar të marrin pjesë paraditen e sotme në ceremoninë e nisjes së punimeve për Xhaminë e madhe të Tiranës.
PROJEKTI
Xhamia e re e Tiranës do nisë të ndërtohet ditën e shtunë, më 20 prill, në sheshin e Namazgjasë. Projekti i xhamisë përshtatet me truallin ku po nis të ndërtohet, si dhe në dizajnin e saj reflektojnë trashëgiminë kulturore shqiptare. Projekti i xhamisë së madhe është bërë nga studio "Hassa" e arkitekt Muharrem Senalp, i cili është mjaft i njohur në fushën e ndërtimit të xhamive. Xhamia duket sikur është e vendosur mbi një qilim, pasi në katin e parë, me një sipërfaqe prej 3500 metrash katrorë, është projektuar qendra kulturore. Ndërsa sipërfaqja e xhamisë është 2500 metra katrorë. Xhamia e Namazgjasë, sipas projektit të studios së projektimit "Hassa", është parashikuar që të ketë katër minare. Lartësia e tyre do të jetë 50 metra, ndërsa kupola qendrore do të jetë 30 metra e lartë. Qendra kulturore, në përbërjen e saj do të ketë sallë konferencash, bibliotekë, muze, por edhe klasa për mësimdhënie. Nga ana vizuale kjo xhami, ndryshe nga projekti i studios BIG që pasqyronte elemente të forta të modernes, është më klasike dhe pasqyron vlera historike të objekteve të tjera të kultit të fesë islame që janë në vendin tonë. Projekti i "BIG-Studio", ishte projekti fitues i konkursit të organizuar nga Bashkia e Tiranës në maj të vitit 2011, e cila ishte parashikuar të ndërtohej në lulishten mbrapa TOB-it, por për shkak të problemeve me pronësinë u vendos që Xhamia e madhe të ndërtohej te Namazgjaja, ku Komuniteti Mysliman ka dhe pronësinë e truallit.
(m.a/Gazeta Shqiptare/BalkanWeb)