Merren nën hetim 150 pacientë shqiptarë. Mashtruan sistemin shëndetësor në Itali në bashkëpunim me tre punonjës. Shkaktuan mbi 1 mln euro dëme. Përfituan fala kurën e kancerit kur nuk u takonte. Zbardhet skema e bashkëpunimit.
ITALI– 150 pacientë shqiptarë janë vënë nën hetim pasi akuzohet se kanë mashtruar sistemin shëndetësor në mënyrë që të përfitonin trajtimin falas për sëmundjen e kancerit, kur nuk u takonte kjo gjë, dhe pas pasojë kanë bërë që sistemi të humbasë më shumë se një milionë euro.
Mediat italiane shkruajnë se shqiptarët, në bashkëpunim me tre punonjës të qendrave shëndetësore në Torino, kanë krijuar një mekanizëm për të përfituar kurimin, madje shumë prej tyre ishin nisur drejt Italisë, posaçërisht për këtë gjë.
Sipas karabinierëve të komandës provinciale të Torinos, ishin tre persona që krijuan këtë mekanizëm: dy gra, shtetase shqiptare, që kishin rolin e ndërmjetësueseve mes emigrantëve dhe qendrave shëndetësore dhe djali i njërës prej tyre. Hetimet e nisura që prej shtatorit të vitit 2019 dhe të përfunduara në tetor të vitit 2020, kanë dalë në përfundimin se tre punonjësit dhe pacientët shqiptarë kanë shfrytëzuar rregullin e Nenit 35 të aktit të konsoliduar të imigracionit i cili lejon qytetarët që nuk janë në gjendje të mirë për të hyrë në trajtim për raste urgjente.
Nëse kriteret njihen, caktohet një kod identifikimi dhe ka qasje në trajtim në objektet publike. Kështu, dy gratë dhe djali i njërës prej tyre u kanë sugjeruar emigrantëve shqiptarë që të deklaronin një datë të rreme të hyrjes në Itali, prej më shumë se tre muajsh, të deklaronin humbjen e mjeteve të identifikimit në mënyrë që të shmangej zbulimi i datës së saktë, në mënyrë që të përfitonin kurën.
Tashmë, hetimi vijon për pacientët shqiptarë, ndërsa tre punonjësit, dy gratë dhe djali i njërës prej tyre janë njohur me masat e sigurisë. Njëra prej tyre është vendosur në ‘arrest shtëpie’, gruaja tjetër në masën ‘detyrim paraqitje’, ndërsa djali është pezulluar nga puna.
(/dosja.al)
