Kresha
A pretty face can never trick me
Ardit Hoxhllaku
Pejgamberi a.s. kohë pas kohe ka dërguar letra për thirrje në Islam mbretërve të shteteve si dhe guvernatorëve të qyteteve të ndryshme. Disa nga këto letra kanë mbërritur deri në kohën tonë të ruajtura nëpër muze si relikte. Këto letra janë shembulli më i bukur i edukatës së lartë, butësisë, faljes dhe mirëkuptimit të Pejgamberit Muhamed Mustafa a.s.
Pejgamberi a.s. qysh në kohën kur Allahu e caktoi si Pejgamber dhe i tha në Kuran që “të kam krijuar mëshirë për gjithë botët” e deri sa u nda nga kjo jetë, ka shërbyer me gjithë forcën dhe mundësinë e tij për të përhapur fenë e Allahut. Një nga këto shërbime që ai kreu gjatë jetës së vet është edhe dërgimi i letrave mbretërve e guvernatorëve kohës. Këto letra të veçanta dhe të pa zëvendësueshme janë bërë shkak që shumë prej njerëzve të hyjnë në Islam. Patjetër që shkrimi i këtyre letrave është shembull i bukur për gjithë myslimanët sot nëpër botë.
Pejgamberi a.s. në të gjitha letrat që ka dërguar në fillim u ka bërë të qartë të gjithë letërmarrësve se Allahu është Një dhe se nuk ka të shoqëruar, vetëm Ai meriton të adhurohet e vetëm nga Ai duhet të kërkohet. Bashkë me këtë u ka shkruar se janë të mbrojtur nga Allahu nëse i bashkohen besimit të vërtetë.
Pasi i ka ftuar në Islam në letrat e tij sqaron dhe u thotë se nëse pranojnë Islamin do të fitojnë sevape të mëdha dhe nëse këtë thirrje ua parashtrojnë edhe popujve të tyre, atëherë Allahu do t’i marrë nën mbrojtjen e Tij. Nëse pranoni thirrjen dhe i bindeni urdhrave të mi, atëherë do ta gëzoni postin që keni edhe më tutje e do fitoni respektin e gjithë myslimanëve, por nëse nuk bindeni, atëherë do t’i mbani ju mbi kurriz hallet e popullit tuaj e do humbisni postin edhe për këtë botë.
Në letrat drejtuar të krishterëve ai ka përmendur versetet e Kuranit në lidhje me marrëdhëniet që duhet të kenë midis njëri-tjetrit pra midis Ehli Kitabit dhe se ku duhet të bashkohen. Allahu në Kuranin Famëlartë thotë:
Thuaju (o i Dërguar): “O ithtarë të librit (Teurat e Ungjill), ejani (të bashkohemi) te një fjalë që është e njëjtë (e drejtë) mes nesh dhe mes jush: Të mos adhurojmë, pos Allahut, të mos ia shoqërojmë Atij asnjë shok, të mos e konsiderojmë njëri-tjetrin zot pos Allahut”! E në qoftë se ata refuzojnë, ju thoni: “Dëshmoni pra, se ne jemi myslimanë (besuam një Zot)!” (Ali Imran, 64)
Letra e dërguar tek Nexhashiu-Mbreti i Etiopisë
Rëndësia e letrës që Pejgamberi (a.s.) i ka dërguar Ashamait Nexhashiut të Habeshes-Etiopisë së sotme është shumë e madhe, sepse ky mbret pasi ka biseduar me delegacionin që i ka dërguar Pejgamberi (a.s.) dhe pasi ka lexuar letrën, ka pranuar t’i strehojë myslimanët në vendin e tij. Pra ka ndjekur një politikë afruese e jo një politikë përçarëse. Pejgamberi (a.s.) në letër thotë kështu:
“ Me emrin e Allahut Mëshiruesit Mëshirëbërësit.
Letër nga i dërguari i Allahut, Muhamedi për Nexhashiun e Habeshes.
Po të dërgoj paqen dhe mëshirën e Allahut i cili është Mbreti i vërtetë, ruajtësi i vërtetë, i shenjti i vetëm që nuk ka shok. Dëshmoj se i biri i Merjemes, Isai është fjala dhe i dërguari i Allahut, të cilin Ai ia dhuroi Merjemes pa e prekur asnjë mashkull. Kështu Merjemja ka ngelur shtatzënë me Isain. Allahu ashtu siç ka krijuar njeriun e parë Ademin nga fryma dhe shpirti i Tij, ashtu ka krijuar edhe Isain. Po të thërras ty për tek Zoti i vetëm i cili nuk ka shok. Të ftoj të bashkohesh me ne në ndihmë e bindje ndaj Tij. Më ndiq mua, besoji atyre që më vijnë mua. Unë me të vërtetë jam i dërguar i Allahut, prandaj të ftoj ty dhe njerëzit që ke përreth të më besoni mua. Ju këshilloj t’i pranoni këshillat e mia kur t’u mbërrijnë. Po të dërgoj nipin tim, Xhaferin që e kam nga xhaxhai bashkë me një grup myslimanësh për te ti.
Paqja qoftë mbi ata që udhëzohen në rrugë të drejtë!
Letra e Pejgamberit a.s. dërguar Mbretit të Egjiptit Mukavis
Me emrin e Allahut Mëshiruesit Mëshirëbërësit.
Letër nga i dërguari i Allahut për të madhin e Koptëve (katolikët e Egjiptit). Paqja dhe mëshira e Allahut qoftë mbi ata që udhëzohen në rrugë të drejtë. Sipas kësaj unë po të bëj ftesë për të hyrë në fenë e vërtetë, Islamin. Hyr në Islam që të jesh i mbrojtur deri në fund. Për këtë Allahu ka për të shpërblyer dy herë me sevape. Por nëse mendon ta refuzosh, mos harro se të gjitha gjynahet e popullit tënd do t’i kesh në kurriz ti.
Letra e dërguar Perandorit Bizantin Heraklius
Në letrën që i ka dërguar perandorit bizantin, Pejgamberi ka shpalosur një shembull të veçantë për ne duke na ka treguar rrugën më të bukur se si duhet t’i kemi marrëdhëniet me pasuesit e Librit. Në këtë letër citon versetin e 64 të sures Ali Imran i cili thotë: “O ithtarë të librit (Tevrat e Ungjill), ejani (të bashkohemi) te një fjalë që është e njëjtë (e drejtë) mes nesh dhe mes jush: Të mos adhurojmë pos Allahut, të mos ia bëjmë Atij asnjë send shok, të mos e konsiderojmë njëri – tjetrin zot pos Allahut”! E në qoftë se ata refuzojnë, ju thoni: “Dëshmoni pra, se ne jemi myslimanë (besuam një Zot)!”
Me emrin e Allahut Mëshiruesit Mëshirëbërësit.
Letër nga i dërguari dhe robi i Allahut për të parin e Bizantinëve Herakliun. Paqja dhe mëshira e Allahut qoftë mbi ata që hyjnë në rrugën e vërtetë. Të ftoj ty në fenë e vërtetë. Pranoje Islamin që të gjesh qetësinë e vërtetë. Pranoje Islamin që Allahu ta shtojë vlerën tënde dyfish. Por nëse nuk e pranon, atëherë do të ngarkohen edhe gjynahet e popullit tënd në kurriz. O ju ithtarë të Librit, ejani bashkohuni me ne tek fjala e vërtetë e Allahut. Ne adhurojmë vetëm Allahun, nuk i bëjmë ortak Atij dhe asnjë prej nesh nuk njeh tjetër për zot përveç Atij. Nëse ata, populli yt, mundohen t’i largohen kësaj thirrjeje, thuaju “jini dëshmitarë se ne jemi prej myslimanëve, ne i jemi dorëzuar Allahut”.
Letra e dërguar Perandorit të Iranit Kisra
Pejgamberi (a.s.) u ka theksuar të gjithë letër-marrësve se Pronar i çdo gjëje është Allahu dhe se vetë është i dërguar i Tij. Në veçanti atyre që nuk janë ithtarë të librit u ka shkruar mbi besimin në një Zot.
Me emrin e Allahut, Mëshiruesit Mëshirëbërësit.
Nga i dërguari i Allahut, Muhamedi për të parin e popullit pers, Kisrasë.
Paqja dhe mëshira e Allahut qoftë mbi ata që besojnë se Zoti është një dhe se Muhamedi është i dërguari i Tij, që nuk i bëjnë ortak dhe nuk adhurojnë tjetër pos Tij. Po të ftoj të pranosh Islamin. Sepse unë jam dërguar për t’i thirrur gjithë popujt në rrugë të drejtë dhe e kam për detyrë t’u çoj ftesë të gjithëve atyre që janë në jetë. Tani pranoni Islamin, fitoni qetësinë e lumturinë e vërtetë. Por nëse nuk e pranoni këtë ftesë, atëherë do keni mbi kurrizin tuaj gjynahet e të gjithë zjarr-adhuruesve (mexhusive).
Letra e dërguar princave të Omanit, Xhaferit dhe Abdit
Me emrin e Allahut, Mëshiruesit Mëshirëbërësit.
Nga Muhamedi i dërguari i Allahut letër dy pasardhësve të Xhulandës, Xhaferit dhe Abdit.
Paqja dhe mëshira e Allahut qoftë mbi ata që janë në rrugë të drejtë. Ju ftoj të dyve që të hyni në Islam. Përqafoni Islamin, shpëtoni nga dënimi. Sepse unë jam i dërguari i Allahut që më ka sjellë në këtë botë për t’u bërë thirrje të gjithë popujve për në të drejtën. Nëse pranoni Islamin, do t’ju jap mundësinë të jeni të parët e vendeve tuaja. Por nëse nuk pranoni Islamin, atëherë posti do të largohet shumë larg nga ju, ushtria ime do vijë në shtetin tuaj, ku do ndërtojnë kampin e tyre e atëherë posti juaj do mbetet nën hijen e forcës së ushtrisë së Pejgamberit.
Letra e dërguar Guvernatorit të El Ahsa’së El Mundhir’it
Me emrin e Allahut, Mëshiruesit Mëshirëbërësit
Letër nga i dërguari i Allahut, Muhamedi për Mundhir b. Sav’a. Paqja e Allahut qoftë mbi ty.
Të ftoj të dëshmosh se nuk ka zot tjetër përveç Allahut dhe se Muhamedi është i dërguar i Tij. Të ftoj të falënderosh Allahun dhe të kujtoj ty se forca e vërtetë është tek Allahu. Kush dëgjon këshillat e mira e ka për veten e vet, e kush nuk i dëgjon po përsëri humb ai vetë. Nëse i bindeni urdhrit të deleguarve të mi, i jeni bindur urdhrit tim. Kush mendon mirë për delegatët e mi, ka menduar mirë për mua. Pa dyshim që delegatët e mi të kanë lavdëruar ty në sy të popullit tënd. Tani dhe unë të pranoj ty për ndërmjetës midis meje e popullit tënd. Para se të pranosh Islamin çdo gjë dorëzoja delegatëve të mi. Unë i fal gjithmonë ata që gabojnë, prandaj edhe ti pranoji gabimet e tyre dhe fali. Nëse ti do të sillesh mirë, ne nuk do të heqim nga posti që je. Por nëse do ngulni këmbë në besimet e kota si zjarr-adhuruesit dhe Judaizmi do t’u lidhim taksa.
Këto letra për të gjithë botën myslimane janë një shembull se si duhet të jenë lidhjet me pasuesit e feve të tjera por edhe me mohuesit.
//breziiri
