-Vendimi i zviceranëve për të ndaluar ndërtimin e minareve, ka forcuar solidaritetin e hebrenjve me myslimanët.
Rabini Pinchas Dunner, drejtor ekzekutiv i Konferencës Europiane të Rabinëve, organizatë kjo ortodokse, theksoi se “me luftën kundër religjionit nuk mund të mposhten ekstremistët islamikë”
Votuesit zviceranë këtë javë miratuan me shumicë absolute të votave kërkesën për të ndaluar ndërtimin e minareve në Zvicër. Kjo masë, për të cilën u angazhua partia e djathtë, Partia Popullore Zvicerane (SVP), u mbështet nga 57 për qind e votuesve.
Sidoqoftë, organizatat hebreje, të cilat kanë kuptuar se masat kundër islamit mund të kenë edhe pasoja për hebrenjtë, dolën në mbrojtje të besimtarëve myslimanë, duke argumentuar se vendimi i votuesve zviceranë është i pajustifikueshëm.
Rabini Pinchas Dunner, drejtor ekzekutiv i Konferencës Europiane të Rabinëve, organizatë kjo ortodokse, theksoi se “me luftën kundër religjionit nuk mund të mposhten ekstremistët islamikë”. “Arma më e mirë kundër islamit radikal është mbështetja për elementet e moderuara në komunitetin mysliman dhe promovimi i dialogut mes besimeve”, shtoi ai.
Për dallim, Lidhja Kundër Defamacionit (ADL) këtë hap ndërlidhës me diskriminimin religjioz të hebrenjve.
“Nuk është kjo vota e parë popullore në Zvicër, e cila është shfrytëzuar për të promovuar jo tolerancën religjioze”, theksoi kjo organizatë në kumtesën e saj.
“Para një shekulli, me referendum në Zvicër u ndalua rituali hebre i flijimit, me qëllim që te dëbohet popullata hebreje”, u theksua më tutje në kumtesë.
Duke nënvizuar se “qeveria zvicerane ka kundërshtuar këtë nismë gjatë fushatës dhe se ka nënvizuar përkushtimin e saj për respektimin e lirive religjioze pas referendumit”, ADL kërkoi nga zviceranet që të mbrojnë liritë religjioze, edhe përkundër faktit se SVP është partia më e madhe në Parlament dhe se mbulon dy nga shtatë ministritë e qeverisë.
Edhe David Harris, nga Komiteti Amerikan i Hebrenjve, dënoi vendimin e zviceranëve. “Rezultati i referendumit është barazi me sulmin kundër vlerave thelbësore të respektit të ndërsjellë. Përderisa ekziston një brengë e kuptueshme në Europë në lidhje me ekstremizmin islamik, kjo assesi nuk mund të legjitimohet me një sulm kundër komunitetit mysliman dhe simboleve të tij religjioze”, tha Harris.
Në ndërkohë, duket se edhe Italia do të organizojë një referendum kundër minareve. Roberto Caldeoli, udhëheqës i partisë së djathtë, Liga Nord, deklaroi:”Respekti për religjionet tjera është i rëndësishëm, por ne duhet të frenojmë propagandën myslimane, ngase në të kundërtën do të përfundojmë me një parti politike islamike”.
Ambasadorja franceze në Izrael, Cristophe Bigot, theksoi se “myslimanëve, si të krishterëve, si hebrenjve, duhet t’u lejohet të ndjekin besimet e tyre si të dëshirojnë”.
“Ajo që është me rëndësi është që Europa të punojë për një islam të moderuar, i cili bazohet në edukim, transparencë dhe liri. Vendimi i Zvicrës do të kufizojë aktivitetet e besimtarëve. Mendoj se kjo nuk ndihmon aspak. Kjo promovon idenë se ne kemi një problem me myslimanët. Por, ne nuk e kemi një problem te tillë. Kemi problem me islamistët. Kemi problem me islamistët dhe myslimanët janë dy dallime tejet radikale. Dhe një vendim i tillë fshin vijat mes tyre”, theksoi Bigot.
I pyetur se a nuk është e njëjta gjë edhe ndalimi i perçes në Francë, Bigot u përgjigj:”Minarja është pjesë e xhamisë dhe myslimanët shkojnë në xhami, nëse janë religjiozë. Një përqindje shumë e vogël e femrave bartin perçe. Këtu po flasim për një pakicë të izoluar në mesin e myslimanëve”.
Në anën tjetër, ndalimi i ndërtimit të minareve në Zvicër u mbështet nga Igumeni Filaret, përfaqësues i Patriarkanës së Moskës në Këshillin e Europës.
“اështja e minareve nuk është çështje e lirive religjioze, por është çështje e pranisë politike të njerëzve të një besimi të caktuar në një shtet. Duke pasur parasysh shpejtësinë e islamizimit, prania e dukshme myslimane do të kishte ngjyrime politike”, tha Filaret. (