Një grua egjiptiane, që ishte veshur dhe ishte shtirur si burrë për 43 vjet, për t’ia siguruar jetesën të bijës pas vdekjes së bashkëshortit, është nderuar këtë javë nga qeveria me titullin “nëna ideale” e guvernaturës së Luxorit.
Drejtoria për Solidaritet Social e Luxorit ka thënë se shpërblimin ia ka ndarë Sisa Abu Daoohut, për vitet e punës së rëndë, në mënyrë që t’ua sigurojë ekzistencën të bijës dhe nipërve të saj, shkruan Koha Ditore.
64-vjeçarja Abu Daooh e humbi bashkëshortin gjatë kohës sa ishte shtatzënë. Pasi që e lindi të bijën, ajo nuk kishte të ardhura që ta mbante atë.
Gjendja e saj komplikohej shkaku i një kulture lokale që kundërshton gratë në vende të punës, gjë kjo që e detyroi të vishej si burrë dhe të punonte jashtë shtëpisë, për ta mbajtur në jetë të bijën, Houdan. Ajo bënte tulla dhe lustronte këpucë në rrugë, midis punëve të tjera./kohaditore/
