Rumania i quan të pavërtetë artikujt për Baseskun
Ministria e jashtme e Rumanisë ka shprehur mospajtimin e saj me veprimin e pazakonshëm të ministrisë së punëve të jashtme të Shqipërisë, e cila e ka pyetur ambasadorin rumun në Tiranë, më 12 korrik, për t’i qartësuar disa akuza për Kosovën, të cilat i ishin atribuuar presidentit Basesku, nga shtypi shqiptar, pas një artikulli të publikuar në Internet, thotë në kumtesën e saj ministria e jashtme e Rumanisë.
Më tutje në kumtesë, theksohet se artikujt që i atribuoheshin presidentit Basesku, ishin kualifikime të pavërteta, për gjoja deklaratat që ai i kishte dhënë për shqiptarët, përfshirë edhe ata në Kosovë.
Ambasadori rumun në Tiranë, e ka hedhur poshtë fuqishëm autenticitetin e këtyre akuzave dhe tha se ne jemi viktima të dezinformatës, që për qëllim ka dëmtimin e raporteve tradicionale të miqësisë ndërmjet Rumanisë dhe Shqipërisë.
Më tutje në kumtesë të ministrisë së jashtme të Rumanisë, theksohet se ambasadori rumun në Tiranë, e ka riafirmuar pozicionin parimor të Rumanisë për Kosovën, duke theksuar se ky qëndrim është mirë i njohur për të gjithë aleatët dhe partnerët evropianë dhe euro-atlantikë të Rumanisë.
Pozicioni i Rumanisë është i bazuar në parimet fondamentale të së drejtës ndërkombëtare, thuhet në kumtesë.
Rumunia dhe ministria e jashtme më 12 korrik i thanë ambasadorit të Shqipërisë në Bukuresht se është totalisht e papranueshme, që ambasadori rumun ishte vënë në pozitë të shpjegoj informatat e paverifikuara nga burime të panjohura.
Kjo lloj qasjeje nuk është në harmoni me nivelin e marrëdhënieve dypalëshe dhe as me mbështetjen e vazhdueshme që Rumania u jep aspiratave evropiane të Shqipërisë.
Në kumtesë theksohet se ministria e jashtme e Rumanisë nuk pajtohet me përpjekjet për zvogëlimin e rëndësisë së dialogut diplomatik dhe me ekzagjerimet e informatave të paverifikuara.
Burimi: KOHA.
