Love
βeℓℓe â๓e
Athina është në flakë, ndërsa nisi greva 48-orëshe kundër planit të kursimit, i cili votohet sot dhe nesër nga Parlamenti grek.Protestuesit u përleshën me policët dhe kanë vënë zjarre të panumërta, kanë thyer xhama lokalesh e dyqanesh dhe kanë qëlluar me mjete të forta policët. Përgjigja me gaz lotsjellës dhe arrestime të shumta ka qenë e shpejtë, por përleshjet kanë vazhduar gjatë. Forcat e rendit janë përpjekur t’i mbanin protestuesit larg nga ndërtesat zyrtare. Më shumë se 5 000 policë po ruajnë sheshin qendror të kryeqytetit grek, Sintagma, ku transporti publik nuk po funksionon. Kryeministri Jorgo Papandreu këmbëngul në shpjegime të vazhdueshme publike se ai e ka rritur me vetëm 28 miliardë euro programin e kursimit dhe kjo do ta ngrejë Greqinë në këmbë sërish. Nëse qeveria greke nuk menaxhon mirë procesin e miratimit të paketës së kursimit në Parlament, atëherë BE dhe FMN mund të pezullojnë këstin e pestë të huas, prej 12 miliardë eurosh.
Greqia bëhet vendi i parë në Eurozonë, që nuk paguan borxhet e saj. Presidenti francez, Nikolas Sarkozi tha se bankat e tij janë gati të ofrojnë një kredi të re 30-vjeçare për Greqinë, ndërkohë që borxhet e këtij vendi janë ende të larta. Por unionet në Greqi janë të zemëruara për masat e reja që do të rrisin taksat mbi rrogat minimale. Planet e para të kursimit e kanë rritur papunësinë në Greqi me 16 për qind. Greva 48-orëshe po shkakton kaos, ndërsa mjekët, shoferët e ambulancave, gazetarët madje edhe aktorët e financuar nga shteti kanë lënë punën. Aeroporti qëndroi i mbyllur për katër orë. Në Athinë, metroja ishte i vetmi mjet transporti që funksiononte “për t’i lejuar grekët të udhëtonin drejt qendrës për të protestuar”, sipas shoferit. Nëse masat e kursimit miratohen, jepet kësti i ri për Greqinë nga BE dhe FMN. Zyrtarët europianë po finalizojnë detajet e një pakete të re huaje, e cila pritet të jetë 120 miliardë euro, me projektin për ta ndihmuar Greqinë të paguajë borxhet e veta deri në fund të vitit 2014. Papandreu tha se shpresonte se kushtet e huas do të ishin më të mira se ato të paketës së parë kreditore. “I bëj thirrje Europës, që nga ana e saj t’i japë Greqisë kohë dhe kushtet që i nevojiten që të arrijë vërtet të paguajë borxhet pa përqindje mbytëse dhe pa shtrënguar qytetarët e saj”.
Optimizëm
Bursat europiane u mbyllën në rritje të martën, pas shtimit të zërave se Parlamenti grek do të votojë pro masave të ashpra të kursimit, një detyrim i cili i jep në këmbim vendit huat e tjera nga kreditorët ndërkombëtarë. Lajmi se Parlamenti grek do ta mbështesë planin e kursimit, u rrit edhe pas njoftimit se Gjermania do të takojë krerët më të lartë të siguruesve dhe bankave për propozimin francez mbi krizën greke.
Burimi: Panorama