Këto janë disa nga pyetjet që po i ndeshim sa vjen e më shpesh nëpër forumet e ndryshme virtuale në internet, e pa dyshim, janë pyetjet që përbëjnë dilemat dhe shqetësimet më të mëdha të çdo prindi, sidomos kur vajza apo djali adoleshent kërkon lejë për të dalë natën vonë. Me nisjen e vitit të ri akademik dhe rikthimin e studentëve në kryeqytet për të vazhduar studimet, duket se dhe jeta e natës në metropol është rigjallëruar, pavarësisht krizës ekonomike globale dhe ankesave të pronarëve të shumë pubeve, klubeve të natës, diskotekave e karaokeve se puna e tyre ka rënë. Madje, frekuentim kanë jo vetëm pubet në zonën e bllokut por edhe ato në periferi dhe jashtë kryeqytetit. Me përjashtim të ndonjë rasti (Venue Club) ende nuk ka hyrë moda e klubeve me shfaqje striptizmi dhe me kubiste, ndërkohë që nuk mungojnë performancat e ndryshme artistike, që nga pasarelat e improvizuara të modës, ekspozitat fotografike apo me piktura, e deri te festat e ndryshme që zhvillohen si “8 marsi”, ditëlindjet, Hallouini, Viti i Ri, Krishtlindjet etj. Të gjendur në vështirësi mbijetese të bisneseve të tyre dhe për t’i tërhequr më shumë klientët, pronarët e mjaft prej këtyre lokaleve kanë provuar të paguajnë vajza sensuale e gjysmë të zhveshura, të cilat qëndrojnë në vende të dukshme ose në banak. Në disa raste të tjera përdoret taktika e ofertës me një apo dy pije falas për të gjitha femrat që frekuentojnë (x) apo
disko apo pub. Moralisht, kjo nuk duket e ndershme por në anën tjetër ligji nuk e ndalon. Brezi i ri dhe ai i mesëm është më i tërhequr nga karaoket, të cilat nisin të funksionojnë pas orës 22:00. Këngët që interpretohen aty janë nga më të ndryshmet, por më tepër këndohen ato të Shqipërisë së Mesme dhe serenatat korçare. Në të njëjtën kohë, të preferuara janë vendet me muzikë live, ku ftohen të performojnë këngëtarë të njohur e të panjohur. Repertori xhaz dhe ritmet e bluzit gjithashtu nuk mungojnë në disa klube nate, të cilat kanë zgjedhur këtë natyrë tërheqjeje për klientët por këto ritme janë më pak joshëse për moshat nën 30 vjeç. Natyrisht, qetësia dhe punonjësit e sigurimit në çdo pub nuk mungojnë. Në ndryshim nga më parë, nuk ndalohet më hyrja e meshkujve, të cilët janë të pa shoqëruar nga femrat dhe zakonisht, hyrja është e lirë, me përjashtim të atyre rasteve të veçanta, kur ka organizime festash speciale, apo të ftuar që performojnë dhe këndojnë; Në këto raste duhet të blesh biletë kundrejt një tavoline të rezervuar me pije falas, e cila mund të jetë një redbull, një shishe verë, apo edhe pije të tjera që kushtojnë në shumën e parashikuar nga bileta. Interesant është fakti që nuk kanë munguar edhe zhvillimet e mbrëmjeve për vetëm femra. Madje, njoftimi për organizimin e tyre është bërë edhe nëpërmjet postës elektronike nga pubet përkatëse. Megjithatë, duhet thënë se pavarësisht tendencave metropolitane mungon një jetë nate mirëfilli, me ato mundësi dhe alternativa që ofrohen në vendet e tjera, duke e nisur që nga shtetet fqinje të rajonit e më tej. Jo rrallë herë, kjo gjë u bën përshtypje edhe turistëve të huaj, të cilët e kanë problem përshtatjen me atë që quhet “jetë nate” në Tiranë. Po çfarë fsheh tjetër jeta e natës në kryeqytet? Jo ndonjë gjë të madhe dhe për këtë ju sigurojmë! Dalja në këto orë të vona mund të alternohet me vajtjen në salla lojërash elektronike apo në kazino, si dhe ushqimin që merret në ato pak fast foode, të cilat qëndrojnë të hapura për 24 orë. Një tjetër fenomen që vihet re në dallim nga disa vite më parë është mosfrekuentimi i diskove, mbyllja e pjesës dërrmuese të tyre apo shndërrimi në karaoke dhe pube me muzikë live. Për të mos përmendur faktin se katër persona të njëjtë, mund t’i dinë katër emra të ndryshëm një pubi apo klubi nate, për shkak se me ndryshimin e pronarit ose të modelit të pubit, apo thjesht për efekte komerciale, emrat e tyre ndryshojnë në vazhdimësi dhe mungon tradita e krijimit të emrave të mirë dhe të ofrimit të një stili të kultivuar të jetës së natës. Nuk po i citojmë debatuesit e forumeve brenda këtij shkrimi por ajo që bie në sy është se shumë prej tyre ngrenë edhe pyetjen: “A ka jetë nate në Tiranë?” Ajo që të bën përshtypje sa u takon lokaleve, është ndarja e tavolinave në individë të të njëjtës gjini. Nuk është çudi që shpesh, në lokalet e Tiranës të shohësh femra të veshura apo gjysmë të zhveshura, me shije e pashije, me rroba firmato apo imitime, të cilat ulen së bashku, pa meshkuj në praninë e tyre, ndërkohë që në tavolinat përballë ulen meshkuj, të cilëve gjithaq u mungon gjinia tjetër. Për një turist italian, Masimon 45 vjeç, qëndrimi në Tiranë nuk mund ta anashkalojë këtë detaj. E gjitha kjo, sipas tij nuk është gjë tjetër veçse një lloj dhune që këto vajza e ushtrojnë me apo pa dashje ndaj seksit të kundërt; “Nuk arrij ta kuptoj arsyen se pse vajzat në Tiranë vishen kaq ekstravagante dhe provokuese. Femra e bën një gjë të tillë atëherë kur do që të joshë dikë, thotë ai, dhe nëse e joshin një mashkull, flirtojnë me të, u pëlqen, atëherë nuk ka arsye pse të mos shkojnë bashkë, qoftë edhe sikur të bashkohen në një tavolinë dhe të njihen të gjithë, të bisedojnë, të argëtohen... ثshtë e trishtueshme të shohësh një panoramë të tillë. Mendoj se te ju, ende nuk është krijuar kultura dhe koncepti i saktë mbi disa marrëdhënie sociale.” Pavarësisht konceptimit dhe zhvillimit të jetës së natës duhet thënë se të paktën shumica e personave që shprehen lidhur me këtë temë, nuk e përmendin sigurinë e tyre si një problem shqetësues. Më e vështirë, kjo çështje bëhet për ato femra që janë të pashoqëruara dhe që iu duhet të marrin taksi ose të përballen rrugës me njerëz të ndryshëm që mund t’i ngacmojnë. Dhe, për hir të së vërtetës, periferia ndryshon shumë nga Blloku dhe nga qendra, e jo vetëm nga rrugët dhe nga errësira... OPINIONE
Olsi: “Tirana ka vetëm jetë dite”
Nuk jam i mendimit që në Shqipëri ka jetë nate. Në Tiranë, në orën 12 të natës nuk ka asnjë makinë në qarkullim, pa lëre njerëz... Nuk diskutohet që ka lokale që frekuentohen deri natën vonë, por dhe këto janë shumë të pakta. Në proprocion me popullsinë Tirana është shumë prapa me jetën e natës, në krahasim me qytet e tjera të Europës. Sot në Tiranë ka vetëm jetë dite, në këtë aspekt jemi të parët, jo në Europë por edhe në botë.
Marsi: “Jeta e natës është relative”
Dihet se “jeta e natës” është relative. Nuk varet vetëm nga ç’ofrohet por edhe nga xhepi, shoqëria që ke, mënyra se si ti e percepton dhe dëshiron ta kalosh natën. Sa për të barazuar Tiranën me kryeqytete europiane, ajo nuk varet nga ç'ofrojnë ambientet në përgjithësi, që me thënë të drejtën janë në të njëjtin nivel me ato të kryeqyteve europiane por edhe nga standarti jetesës dhe gjendja e Shqipërisë. Ato që kanë ngelur të pakënaqur nga Tirona duhet të dinë se ku të shkojnë. Problemi është për sa e shikoj unë te xhepat, që kur janë të vegjël nuk mbajnë shumë pare dhe kur mbarohet parja nuk punon më darja...
Ardi: “Jetë nate, alla Shqipëri”
E para e punës, jeta e natës do kulturë. Sa herë që ik nga Shqipëria ma ngrejnë mëndjen duke më thënë se është bërë bukur, ka jetë nate etj. Unë i shkreti vij dhe pres të gjej jetë nate si këtej në Perëndim. Jetë nate i thënçin, se kur shkon në pub, siç quhen diskot në Tiranë, mos bëj gafë të jesh tek pullë ose vetëm me ndonjë shok se nuk të flet njeri me gojë. I thua një femre gjysmë të zhveshur “mirëmbrëma” ose “ç’kemi” dhe ajo ngrys vetullat e të shikon sikur e ke sharë nga nëna. Për disa arsye të ende të pashpjegueshme për mua, kjo sjellje e femrave tona ndryshon me të huajt, të cilëve u mblidhen si bleta pas mjaltit.
Nuk është se po flas nga zilia ose inati apo ndonjë gjë tjetër, sepse nuk më bëhet vonë fare, por kur flisni për jetën e natës quheni “jetë nate në Shqipëri”.
Ina: “Nata është e bukur në Tiranë...”
Më pëlqen të pi ndonjë gotë verë me shoqen e ngushtë ose kushërirën. Të enjteve ose të premteve shkojmë edhe në karaoket e Bllokut me shoqërinë. Nuk e di si është jeta e natës jashtë pasi nuk kam dalë ndonjëherë, por edhe në Tiranë mendoj se bëhet shumë bukur.
Berni: “Jeta e natës është kuptuar gabim”
Rinia shqiptare nuk e ka akoma kulturën e natës për shumë motive, por dhe ata që e kanë kuptuar jetën e natës, e kanë kuptuar gabim. Gjatë ditës kafenetë dhe lokalet i ke të mbushura plot në vend që njerëzit të merren me ndonjë punë. Pastaj, Tirana nuk është vetëm Blloku apo Qyteti Studenti. Unë që kalova Vitin e Ri në Tiranë, e them me plot gojë se jeta e natës ishte zero.
Liza: “Kur je vetëm problem është transporti”
Tirana ka jetë nate por duhet të dish vendet ku të shkosh dhe shoqërinë me të cilën do të dalësh. Për mua që jam femër dhe që banoj në periferi, më shumë problem janë taksitë. Nuk mund t’u zesh besim të tjerëve nëse je e pa shoqëruar në orët e vona. Po dëgjojmë çdo ditë nga të gjitha llojet...
Petrika GROSI
