Shkrimtarja Albana Mëlyshi Lifschin ka dhënë me vëllimin e saj të ri me tregime “Ura mbi oqean” një dëshmi se sa e mundur është që të mos biesh në vulgaritetin e këshillimit të njerëzve, e pajisjes së tyre me informacion shërbimi social dhe njëkohësisht niveli artistik të mos cënohet. Në duart e lexuesve vjen një libër që ruan vlera artistike shumë të arrira dhe ndërkohë i mëson ata si të sillen në mjediset e vendit të madh të amerikanëve, si të mos bëjnë gabime kur të emigrojnë, si t'u drejtohen avokatëve, firmave të punës, si të dinë të sillen në zyrat e punëdhënësve apo të mbushin dokumentet e qëndrimit, si të zbatojnë rregullat e bashkëjetesës apo të mos bien viktimë e mashtrimeve. Prezantimi i letërsisë së krijuar nga emigracioni shqiptar në SHBA ishte qëllimi i aktivitetit të organizuar dje në ambientet e Ministrisë së Punëve të Jashtme, gjatë së cilit u promovua edhe libri "Ura mbi oqean" i shkrimtares shqiptaro-amerikane, Albana Mëlyshi Lifschin. Kjo nismë e Institutit Kombëtar të Diasporës shqiptare synon para së gjithash të vërë në dukje një këndvështrim tjetër të diplomacisë shqiptare, diplomacinë kulturore dhe promovimin e imazhit të Shqipërisë jashtë vendit. Drejtori i Institutit Kombëtar të Diasporës, Flamur Gashi, solli në vëmendje aktivitetet e shumta që janë organizuar nga ky Institut për promovimin e ekspozitave dhe librave të autorëve shqiptarë që jetojnë dhe krijojnë jashtë Shqipërisë. “Promovimi i librit më të fundit të bashkëkombëses sonë shqiptaro amerikane, Albana Mëlyshi Lifschin, dëshmon para opinionit publik se tashmë ne kemi një letërsi shumë cilësore të krijuar nga emigracioni shqiptar, e cila po kulmon jo vetëm në SHBA, por edhe në vende të tjera evropiane, si Itali, Greqi, etj”, pohoi Gashi. Duke iu rikthyer kujtesës kombëtare për sa i përket letërsisë shqiptare të krijuar në SHBA, ai vuri në dukje se: "Me këtë vend lidhet biografia letrare e autorëve të tillë si Fan Noli dhe Faik Konica, dy nga mendjet më të ndritura të kombit shqiptar. Ekzistenca e pandërprerë e kësaj letërsie cilësore dëshmon më së miri se sa e thellë dhe e natyrshme është lidhja shpirtërore mes shqiptarëve dhe amerikanëve. Një i larguar nga vendi i vet mund të krijojë letërsi vetëm në një vend ku ndihet i qetë dhe i respektuar. Arti krijohet vetëm atje ku inkurajohet dhe një gjë e tillë ndodh në SHBA”. Në këtë aktivitet autorja e librit "Ura mbi oqean", Albana Mëlyshi Lifschin, u shpreh se: “Libri synon t'i vijë në ndihmë atyre emigrantëve që shkojnë në SHBA, dhe kjo duket edhe në renditjen tematike të tregimeve". Tridhjetë e gjashtë tregimet e tij brenda dyqind faqeve rrëfejnë artistikisht jetën e emigrantëve tanë në Shtetet e Bashkuara të Amerikës. Në jo pak raste përshkruajnë edhe ngjarje nga jeta midis Shqipërisë dhe kontinentit amerikan, gjyshe që shkojnë në SHBA të takojnë nipërit e mbesat e tyre, një deputet nga Tirana, një tiranase që në Nju Jork shkoi sa për të mbledhur para që të bënte varrin e të vjehrrit.
__________________
__________________