PiNkY
Anëtar i Nderuar
U përmbyll me fund të lumtur, çështja e zhdukjes së çuditshme të Xhevahir Gjutës, i njohur ndryshe si Jimmy, zhytësi shqiptar 26 vjeçar i cili ishte zhdukur në det, në Punta Ala në Itali, në muajin mars.
Në të vërtetë u shtir sikur u zhduk, dhe për katër muaj jetoi në hije duke u fshehur. Ishte kushëriri i tij me të cilin jetonte në Grosseto ai që deklaroi zhdukjen dhe nga ai moment për dhjetë ditë me radhë, policia, karabinierët dhe Roja Bregdetare, nisën kërkimet në kushte të vështira të motit, por pa rezultat.
Makina e të riut u gjet në një shteg që të çonte në plazh pranë disa shkëmbinjve dhe në breg të detit ishin gjetur rrobat e zhytjes, duke rritur mundësitë që ai të kishte vdekur i mbytur në det, ose ndoshta Jimmy kishte ikur në këmbë dhe kishte shkuar te disa miq të tij.
“Kur kushëriri i tij u paraqit i alarmuar në polici, nisën kërkimet dhe u mendua për më të keqen. Jimmy ishte mbytur në Punta Ala dhe trupi i tij ishte fundosur”, shkruan noa, duke rindërtuar ngjarjen, ashtu si dhe një sërë mediash të tjera që i bën jehonë lajmin.
Por e vërteta është se Jimmy vetëm ishte shtirur se ishte zhdukur në det, pasi i riu pa dokumenta dhe kartë identiteti shkoi në Milano dhe për katër muaj me radhë jetoi rrugëve.
Arsyeja? Kishte shumë gjëra që do të donte të ndryshonte në jetën e tij, mes tyre një martesë e caktuar për në 15 prill në Shqipëri, kishte ndërtuar një tjetër jetë larg vendit të origjinës, ishte puna dhe një sërë përgjegjësish të tjera që e rrethuan duke e shtyrë të arratiset.
Të shtunën e kaluar Jimmy, ndoshta i lodhur nga jeta rrugëve, u rishfaq në Grosseto, për të vizituar një miken e tij. Pas kësaj u paraqit në policinë e Punta Ala dhe tregoi mes lotësh, gjithë atë që i kishte ndodhur gjatë këtyre katër muajve, duke bërë të pamundurën për të mos u gjetur nga policia, të afërmit madje ca më shumë nga e fejuara.
Xhevahir Gjuta deklaroi se donte të zhdukej nga një jetë që nuk e ndiente më të tijën dhe nga një martesë me mblesëri, prej së cilës do martohej me zor pak ditë pasi ndërmori veprimin ekstrem./noa/
