Mali i Zi miraton Rezolutën, bazë për njohjen e shtetësisë së Kosovës

Parlamenti malazez ka miratuar sonte Rezolutën për përshpejtimin e integrimeve evropiane të Malit të Zi në strukturat evropiane dhe euroatlantike, e cila është propozuar nga koalicioni qeverisës që do të jetë edhe bazë për përcaktimin e këtij vendi fqinj ndaj pavarësisë së Kosovës. Për miratimin e Rezolutës kanë votuar 45 deputetë, derisa 21 kanë qenë kundër.
Në Rezolutë thuhet se Mali i Zi është i gatshëm të konfirmoj realitetin politik të cilin anëtarët e Bashkimit Evropian dhe NATO-s e vlerësojnë si të rëndësishme për stabilitetin rajonal dhe ndjekë politikën e cila është në kursin e përcaktimeve të saj evropiane dhe euroatlantike.

"Kjo (rezoluta) do të jetë bazë për përcaktimin e Malit të Zi ndaj çështjes së Kosovës", thuhet në dokumentin e miratuar.

Gjatë seancës, pjesa më e madhe e kohë e cila iu kushtua Kosovës, kryeministri malazez, Millo Gjukanoviq, ka thënë se Mali i Zi do të ndjekë politikën realiste dhe atë që e ndjek edhe Brukseli.

Pa dhënë ndonjë datë të veçantë, Gjukanoviq ka lënë të kuptohet se njohja nga Podgorica do të vijë shumë shpejt. Sipas tij, nuk ka nevojë të pritet mendimi i Gjykatës Ndërkombëtare të Drejtësisë, sepse Kosova është çështje politike dhe jo juridike.

Ai ka thënë se nuk brengoset për mendimin e Beogradit pas këtij akti të Malit të Zi, sepse Beogradi e ka humbur Kosovën me politikën e gabueshme.

"Serbia nuk e kryen asnjë funksion në Kosovë, dhe nuk e ka asnjë institucion në Kosovë. Kosova është sovrane në politikën e jashtme, në siguri, në mbrojtje, në politikat tatimore, në sistemin monetar, në ekonominë e jashtme, në gjithçka. Gjatë gjithë kësaj kohe funksionarëve më të lartë në Beograd u kam thënë se kjo është rezultat i politikës së gabueshme dhe se Serbia duhet ta shohë të vërtetën në sy", ka thënë Gjukanoviq.

"Karakteristikë e Malit të Zi është të ndjek politikën e realitetit, e jo iluzionit politik", ka thënë kryeministri malazez, duke hedhur poshtë zërat se politikën ndaj pavarësisë së Kosovës është diku i krijuar sipas presioneve.

Duke mohuar ekzistimin e çfarëdo presionesh në Mal të Zi për të pranuar pavarësinë e Kosovës, Gjukanoviq ka thënë se shteti i tij ndjek politikën e realizmit, e cila është e bazuar në parimin e besimit të fituar nga qytetarët, i cili nënkupton mbrojtjen e interesave shtetërore.

Ai ka përsëritur që hyrja e Malit të Zi në BE dhe NATO është qëllimi i saj strategjik, si garanci i stabilitetit në rajon./Telegrafi/