50 lopë, 70 dele e 30 dhi...dhe në këmbim të gjithë kësaj pasurie, dorën e Malia-s, vajzës 16-vjeçare të Presidenit amerikan, Barack Obama.
Kjo është oferta që mbërrin nga Kenia. Një jurist me profesion, që zotëron edhe një fermë, deklaroi për mediat vendase interesimin e tij për vajzën e çiftit presidencial amerikan.
Felix Kiprono tha për gazetën “The Nairobian” se ishte interesuar për Malian që në vitin 2008, e për më tepër, premton besnikëri ndaj saj…gjithmonë nëse Barack Obama do të pranojë lopët, delet dhe dhitë.
“Në fakt nuk kam fjetur me asnjë femër dhe i premtoj që do t’i jem besnik vetëm asaj”- thotë Kiprono.
Aq serioze është oferta, sa Kiprono po planifikon t’i dërgojë një letër presidentit amerikan, që gjatë vizitës së muajit korrik në Kenia, vendlindja e të atit të Barack Obamas, të marrë me vete edhe Malian.
“Romeo” kenian këmbëngul se dashuria e tij për Malian është “e vërtetë dhe e sinqertë”.
“Do të jetojmë një jetë të thjeshtë, si burrë e grua. Do të mësoj Malian sesi të mjelë një lopë, si të gatuajë qull misri dhe si të bëjë gjizën, si çdo grua tjetër keniane”- thotë ai.
Malia është vajza e madhe e çiftit presidencial amerikan.
/ Top Channel
