Kryqi i Gruevskit në Kalanë e Shkupit

Kërbaçi vrastar i qeverisë sllavo-maqedone nuk ka të ndalur mbi shpinën e shqiptarëve, kurse partive politike shqiptare përditë e më tepër po iu humb qëllimi i tyre i organizimit.



Vazhdon kryqëzimi i tokave shqiptare, vazhdimi kryqëzimi i objekteve historike shqiptare, vazhdon linçimi i jetës shqiptare në të gjitha pikëpamjet. Më se gjashtë dekada krijesa me emrin IRJM kolonizon me dokument dhe pa dokument vendbanimet shqiptare, shtëpitë, tokën, rrugët, ujin dhe ajrin e shqiptarëve. Më se gjashtë dekada Qeveritë e Shkupit ashtu si ato Beogradit mbjellin me dekret vdekje për shqiptarët.
Nëpërmjet qëndrimeve politike, ligjeve dhe projekteve antishqiptare gjatë kësaj kohe kanë dërguar në rrugën e pakthimit më se një milion shqiptarë, edhe atë në Turqi, në Evropën Perëndimore, në Amerikë si dhe në vendet tjera të botës.
Kërbaçi vrastar i qeverisë sllavo-maqedone nuk ka të ndalur mbi shpinën e shqiptarëve, kurse partive politike shqiptare përditë e më tepër po iu humb qëllimi i tyre i organizimit.
Dhe parashtrohet pyetja pse ekzistojnë? - Pse këto parti janë regjistruar në administratën sllavo-maqedone? - Pse këto parti ekzistojnë në jetën politike në IRJM, kur të gjitha institucionet e këtij shteti ushtrojnë terror shtetëror mbi popullin shqiptar!
Dihet fakti se këtë kryq që po e instalojnë politikat gjenocidiale të Nikolla Gruevskit dhe kompanisë së tij, dhunshëm po e mban mbi shpinë populli shqiptar, por si po e mbajnë kryetarët e partive shqiptare?
Natyrisht se me vetëdëshirë, sepse po të ishte ndryshe kolltukët e Parlamentit antishqiptar në Shkup dhe institucionet antishqiptare në Shkup dhe më gjerë do t`i zbardh dita pa shqiptarë. Që 20 vjet bredhin shqiptarët nëpër institucionet sllavo-maqedone në të cilat institucione projektohen fushatat antishqiptare. Dënimi i shqiptarëve me qindra vjet burg, proceset e montuara politike, ndëshkimet, arrestimet dhe vrasjet e shqiptarëve në prag të shtëpisë dëshmojnë se IRJM është shndërruar në një kamp të terrorit shtetëror mbi shqiptarët. Kukullat e vjedhura nga antikiteti, përmendoret e kidnapuara nga historia bullgare, si dhe figura e nënës Terezë nuk e pasurojnë IRJM, por përkundrazi dëshmojnë se nuk mund të ekzistoj një shtet pa të kaluarën e tij historike.
Dhe në fund, thënë shkurtë, është e kuptueshme se pse qeveria sllavo-maqedone e Shkupit vepron në këtë mënyrë në krye me N. Gruevskin, por pakuptueshme është pse partitë politike shqiptare sillen që 20 vjet me kryqin e IRJM në shpinë, duke formuar një dekor të neveritshëm politik.

Shkup, prill 2010 Shkruan: Vaxhid Sejdiu /Albaniapress/