Reshjet e ditëve të fundit, si dhe përmirësimi i ndjeshëm i situatës hidrike në kaskadën e Drinit gjatë stinës së dimrit, kanë rritur në maksimumin e mundshëm nivelin e ujit në hidrocentralin e Fierzës dhe atë të Komanit, 2 prej HEC-eve që sigurojnë prodhimin më të madh të energjisë në vend.
Sipas raportimeve nga korporata elektro-energjitike, aktualisht KESH është duke eksportuar rreth 12 milionë kilovat orë energji, shifër rekord po t’i referohesh bilanceve të kompanisë gjatë 2 viteve të fundit.
Burime zyrtare nga korporata konfirmojnë se që prej muajit mars po eksportohet energji çdo ditë, duke siguruar të ardhura të kënaqshme, raporton Vizion Plus. Sipas korporatës niveli prej 297 metrash në Fierzë, i cili tashmë ka tejkaluar edhe maksimumin e lejuar, bën të mundur sigurimin e energjisë edhe gjatë muajve të verës. Nisur dhe nga situata e shitjes së energjisë në të gjithë rajonin e Ballkanit, KESH ka arritur të gjejë një çmim shitjeje mesatar prej 30 euro për megavat orë, çka siguron afro 350 mijë euro fitime në ditë./TemaOnline
