De Biasi largohet nga Shqipëria

De Biasi pritet të largohet nga Kombëtarja shqiptare pas ndeshjes me Izraelin, e cila luhet me 11 qershor në kuadër të eliminatoreve për Botërorin ‘Rusia 2018’
Aventura e Gianni De Biasir në drejtimin e Shqipërisë po vjen drejt fundit dhe nuk do të presë mbylljen e kontratës, e cila skadon kur përfundon edicioni i eliminatoreve të Botërorit 2018.

Sipas faqes së internetit të gazetarit italian të njohur, Alfredo Pedulla, De Biasi do të largohet që në javët e ardhshme nga drejtimi i Shqipërisë. Sipas saj, ai ka disa mundësi të ndryshme punësimi në klube të njohura në Europë.

Por njëkohësisht, trajneri i kuqezinjve ka tundim edhe nga dy oferta kineze që janë shfaqur gjatë ditëve të fundit.

I njëjti burim sqaron se më shumë do të mësohet në mesin e muajit qershor, pasi trajneri të jetë shkëputur përfundimisht nga drejtimi i Kombëtares.

Ish trajneri i disa skuadrave italiane tashmë ka hyrë në histori të Shqipërisë duke e kualifikuar ekipin kuqezi për herë të parë në një eveniment të madh siç ishte Euro 2016. /Express/

Pas një eksperience më shumë se katër vjeçare dhe mjaft te bukur, Gianni De Biasi është drejt largimit nga Shqipëria. Trajneri i Kombëtares kuqezi mësohet se ka marrë oferta të rëndësishme nga Kina dhe për pasojë pritet që të largohet drejt kontinentit aziatik për të marrë drejtimin e ndonjë skuadre atje.

Gazetari italian Alfredo pedulla ka bërë publik këtë lajm, teksa mësohet se De Biasi mund të jete duke drejtuar ndeshjet e fundit të Shqipërisë. Sipas të gjithë gjasave, italiani do të jetë në pankinë edhe për dy ndeshjet e radhës së kuqezinjve në miqësoren kundër Luksemburgut dhe në ndeshjen eliminatore ndaj Izraelit.

Më pas De Biasi do të largohet për të kaluar në Kinë, atje ku e pret një kontratë e majme në krahasim me atë që ai fiton te Shqipëria. Ende nuk ka asgjë zyrtare, por mediat italiane e bëjnë fakt të kryer këtë gjë dhe pritet që largimi të ndodhë menjëherë pas ndeshjes me Izraelin.