TIRANE - Valon Behrami, Granit Xhaka, Admir Mehmedi e Xherdan Shaqiri, janë në qendër të shtypit zvicerian këto ditë. Përballja me Shqipërinë ditën e nesërme është e veçantë për koloninë e kosovarëve që veshin fanelën e përfaqësueses helvete, pasi ata do të jenë përballë skuadrës që përfaqëson kombin e tyre. Valon Behrami është ai që i druhet më shumë kësaj sfide, duke qenë se mesfushori është kërkuar me ngulm nga Shqipëria në vitin 2004, por zgjodhi të luante me Zvicrën. "E di që shqiptarët do më provokojnë gjithë kohës, pasi kështu më ka ndodhur edhe te Lacio, - shprehet futbollisti që luan në Serinë A me Napolin. - Jam i sigurt se ata do më thërrasin gjatë gjithë kohës tradhtar, por unë do të jap gjithçka që Zvicra të fitojë", shtoi ai. Valon Behrami është nga ata futbollistë që kanë dalë në "merkaton" e madhe të futbollit shumë shpejt. Në vitin 2004, Hans Peter Brigel e kërkoi disa herë për ta bërë pjesë të kombëtares, por edhe pse u zhvilluan disa takime dhe lojtari premtoi që do të zgjidhte Shqipërinë, në fund preferoi Zvicrën. Pas 8 vitesh dhe një zgjedhjeje që la të prekur shumë tifozë, Behrami thotë se ndjehet sërish kuqezi. "Nuk do ta harroj kurrë se nga vij. Unë kam bërë tatuazh shqiponjën, simbolin e Shqipërisë, që ma kujton gjithmonë, - shprehet më tej ai. - Mesazhi im është i thjeshtë: duhet ta përgatitim këtë ndeshje si gjithë të tjerat", shton futbollisti me origjinë kosovare.
Tifozët
Në Lucernë, fakti se mund të jenë më shumë tifozë shqiptarë se zvicerianë në stadium, është kthyer në një shqetësim të vërtetë. Sipas shtypit vendas, nga 12 mijë bileta që janë nxjerrë në shitje, një pjesë e madhe e tyre kanë rënë në duart e shqiptarëve. "Zakonisht ato blihen nga njerëzit që bëjnë tifozllëk për Zvicrën, por bën përjashtim rasti kur ne luajmë kundër Shqipërisë", tha një zyrtar i Federatës Zviceriane të Futbollit. I çuditshëm është fakti se në Lucernë luajnë edhe futbollistë shqiptarë, siç është Jahmir Hyka. "Ne do të luajmë në shtëpi", ka thënë fantazisti kuqezi për mediat zviceriane. Po ashtu, në Zvicër luan edhe Armando Sadiku, ndërkohë që mesfushori Burim Kukeli është i martuar me një zviceriane. "Lojtarët që kanë zgjedhur Zvicrën shihen nga të gjithë në Shqipëri si tradhtarë, ndërsa misioni i kombëtares shqiptare do të jetë ai që t'i bindin Shaqirin and co. se kanë bërë zgjedhjen e gabuar", shkruan gazeta "Le Matin". Lidhjet e futbollistëve shqiptarë me Zvicrën shkojnë edhe më tej, pasi edhe kapiteni Lorik Cana e ka nisur aventurën e tij në Evropë pikërisht nga Lozana, ku qëndroi për 3 vjet përpara se të firmoste me Paris Sent Zhermen. Ndërkohë, vetëm një vit më parë, ish-trajneri i kombëtares Josip Kuzhe zhvilloi një "zbor" 3 ditor në Zvicër, ku grumbulloi një pjesë të madhe të futbollistëve me origjinë kosovare që luajnë në këtë vend dhe që ende nuk kanë zgjedhur një përfaqësuese.
/balkanweb