Një studente 19-vjeçare ka vjedhur një palë streçe në një qendër tregtare në Tiranë pa menduar se do t’i kushtonin më pas 100 mijë lekë të rinj. Kaq është gjoba që i ka vënë Gjykata e Tiranës studentes së Fakultetit Ekonomik, Ina L., pasi e shpalli të fajshme për akuzën e “vjedhjes”.
Bashkë me streçet, studentja ka vjedhur edhe një bluzë, që në total, me çmimin e dyqanit kushtonin 7900 lekë. Sipas Gjykatës, Ina L. u dënua me 1.5 milionë lekë të vjetër, por ajo përfitoi uljen e një të tretës për shkak të gjykimit të shkurtuar. Vendimi i fajësisë për studenten e Ekonomikut u shpall pak ditë më parë në Gjykatën e Tiranës, ndërsa episodi i vjedhjes është shënuar në një qendër të madhe tregtare në segmentin rrugor Tiranë-Durrës në nëntor të vitit të kaluar.
Sipas Gjykatës, studentja është kapur “me presh në duar” nga rojet e sigurisë së qendrës tregtare, pasi ishte pikasur nga shitësja e dyqanit ku kishte vjedhur. Në kallëzimin që ka bërë shitësja M. M. ka rrëfyer se ditën e ngjarjes, rreth orës 14:00, në dhomën e provës të këtij dyqani ka hyrë një shtetase, të cilën nuk e njihte më parë. Në dhomën tjetër të provës ka hyrë një person, të cilin e ka dëgjuar duke i thënë shoqes së tij: “Mbarove zemër? I provove zemër?”. Sipas shitëses, pasi kanë folur për pesë minuta me njëri-tjetrin, klienti mashkull ka dalë nga dhoma e provës me një palë xhinse në duar.
Ndërkohë klientja femër, që kishte hyrë në dhomën e provës me 4 artikuj, ka dalë prej aty me dy të tillë. Pas këtij momenti shitësja ka gjetur një sinjal alarmi për rrobat e hequra. Më pas shitësja është kontaktuar dhe nga menaxherja e saj, e cila i ka thënë të kontrollonin vajzën e ndaluar nga rojet e sigurisë, pasi në tualet ishin gjetur dy etiketa që përkonin me një palë streçe dhe një bluzë. Streçet me shumë ngjyra dhe bluza ngjyrë gri, me mbishkrimin “Born To Be A Rock Star”. Gjatë gjyqit 19-vjeçarja ka pranuar akuzën dhe ka treguar pendesë të thellë.
/BalkanWeb
