Fluksi i madh i emigrantëve që duan të largohen nga Shqipëria në drejtim të Italisë ka shkaktuar mesditën e sotme kaos dhe trafik në Portin e Vlorës dhe në brendësi të qytetit.
Një numër i madh automjetesh janë parkuar drejt Portit të Vlorës dhe presin në radhë për tu larguar me tragete nga Shqipëria. Shefi i qarkullimit rrugor në Vlorë, Adriatik Huti bëri të ditur se automjetet e parkuara brenda ambienteve të Portit kanë shkaktuar kaos dhe trafik të madh.
Moria me njerëz, ku nuk mungojnë gratë dhe fëmijët presin në radhë për tu larguar nga Shqipëria. Sipas Hutit zhvendosja e automjeteve nga rrugët në drejtim të ambienteve të Portit është bërë për të zhbllokuar rrugët kryesore në Vlorë që këto ditë vere po frekuentohen shpesh nga turistët, sidomos fundjavave.
Shefi i qarkullimit rrugor për Vlorën shton se kaosi është shkaktuar pasi edhe agjencitë e udhëtimit kanë shitur bileta më shumë se kapaciteti i lejuar në tragete, ndaj emigrantët janë drejtuar dyerve të Portit me shpresën se do të largohen që sot. Policia ndërkaq u bën thirrje emigrantëve që të devijojnë rrugët e brendshme të Portit për të mos rënduar më tej situatën e krijuar.*gazeta start*