Bashkimi Europian tha se po bën planet për të përballuar një krizë të mundshme humanitare mes shtimit të kontrolleve kufitare që pengojnë lëvizjen e refugjatëve përmes Ballkanit.
Greqia ka shprehur pakënaqësinë e saj pasi mijëra emigrantë mbetën të bllokuar në vend, pasi Maqedonia u refuzoi hyrjen shtetasve afganë e shtyrë nga masat e reja të Austrisë. Të dhënat e fundit tregojnë një rritje dramatike të numrit të emigrantëve që mbërrijnë në Europë.
Organizata Ndërkombëtare për Emigracionin, IOM, tha se me shumë se 100 mijë azilkërkues kanë mbërritur në kontinentin e vjetër deri më tani gjatë këtij viti, ndërkohë që në 2 muajt e parë të 2015-s të ardhurit ishin më pak se 4 mijë.
“Jemi mjaft të shqetësuar për zhvillimet e fundit përgjatë itinerarit ballkanik dhe krizës humanitare që mund të shpaloset në vende të caktuara, veçanërisht në Greqi”, thanë në një deklaratë të përbashkët komisioneri i BE për emigracionin, Dimitris Avramopoulos dhe ministri holandez të Emigracionit, Klaas Dijkhoff.
Ata u bënë thirrje të gjitha vendeve të prekura të marrin masat e duhura në mënyrë që të përballojnë një krizë të mundshme humanitare.
“Paralelisht, Komisioni po koordinon përpjekjet parapake për të ofruar mbështetje në rastin e një krize brenda ose jashtë BE, e për të koordinuar më tej menaxhimin e kufijve”, vijon më tej deklarata.
Gjithashtu kreu i agjencisë së OKB për refugjatët, UNHCR paralajmëroi se mbyllja e kufijve do të shkaktonte kaos dhe konfuzion të mëtejshëm. Gjatë një vizite në ishullin grek të Lesbosit, ku mbërrijnë shumica e emigrantëve, Filipo Grandi tha se barra për Greqinë rrezikonte të bëhej edhe më e rëndë nga çishte.
Te martën Greqia filloi të kthente mbrapsht qindra emigrantë të bllokuar në kufirin e saj me Maqedoninë. Këta të fundit mbyllën të gjitha pikat e kalimit të hënën pas protestave dhe bllokimit të një linje hekurudhore nga emigrantët afganë.
/ Top Channel