KIEV - Përleshjet janë intensifikuar në kryeqytetin e Ukrainës Kiev, ku janë dëgjuar shpërthime të forta. Sipas mediave vendase, protestuesit kanë hedhur bomba molotov dhe fishekzjarre ndaj kordonit të policisë. Ndërkohë, gjatë ditës janë vrarë 25 persona si dhe janë plagosur mbi 1 mijë protestues.
Rreth 241 persona janë shtruar në spitale, si pasojë e plagëve të rënda, ndër të cilët 79 policë dhe pesë gazetarë, theksonte ministria.
Presidenti ukrainas akuzoi sot opozitën për nxitje të revoltave kundër pushtetit.
Po ashtu, një gazetar ukrainas i së përditëshmes ”Vesti”, është vrarë në afërsi të zonës së përleshjeve mes protestuesve dhe forcave policore, theksonte gazeta.
Vendi po përfshihet nga dhuna, ndërsa grupe të ndryshme manifestuesish kanë marrë kontrollin e disa ndërtesave qeveritare dhe depove të armëve në Lviv, në perëndim të Ukrainës.
Përfaqësuesja e Lartë e Bashkimit Evropian për Politikë të Jashtme dhe Siguri, Catherine Ashton ka dënuar të martën “përshkallëzimin e rëndë” të dhunës në Kiev, pas përleshjes së protestuesve dhe policisë.
“Jam shumë e shqetësuar me përshkallëzimin e rëndë në Kiev dhe viktimat e raportuara”, - ka thënë Ashton përmes një deklarate, duke theksuar se dënon “çfarëdo përdorimi të dhunës, përfshirë edhe atë kundër pronës publike dhe partiake”.
“I bëj thirrje drejtuesve politik në Ukrainë që të adresojnë shkaqet e krizës”, ka thënë ajo, duke bërë thirrje që palët të kthehen urgjent në proceset parlamentare për të tejkaluar dallimet. “Liderët politik duhet të marrin përgjegjësinë e tyre dhe të rindërtojnë besimin për të krijuar kushtet për një zgjidhje efektive të krizës politike”,- tha ajo.
Protestat kanë nisur fillimisht si shenjë pakënaqësie kundër vendimit të presidentit Janukoviç, për të mos firmosur marreveshjen me Bashkimin Europian.//BalkanWeb
