Emigrantët rrezikojnë “status kuonë”; Austria dërgon ushtrinë në kufi

To view this content we will need your consent to set third party cookies.
For more detailed information, see our cookies page.

Accept third party cookies

Mijëra refugjatë mund të lihen në “status kuo” për shkak se vendet evropiane po miratojnë rregulla të ndryshme për kontrollin e kufijve, përballë një fluksi rekord të emigrantëve.

Paralajmërimi është bërë nga agjencia e OKB për refugjatët, UNHCR, që ka bërë thirrje për krijimin e qendrave të mëdha pritëse për t’u ardhur në ndihmë emigrantëve.

Deklarata ka ardhur pasi Gjermania vendosi kontrolle në kufijtë e saj me Austrinë, ndërsa kjo e fundit paralajmëroi këtë të hënë dërgimin e ushtrisë në kufi për t’i bërë ballë fluksit.

Ministrat e Brendshëm të vendeve anëtare të BE-së pritet të mbajnë një takim të jashtëzakonshëm mbi krizën e emigrantëve më vonë gjatë së hënës.

Ata pritet të votojnë një plan nga për shpërndarjen mes tyre të rreth 40 mijë azilkërkuesve nga Siria dhe Eritrea, përmes kuotave të përcaktuara, edhe pse vendet e Evropës qendrore dhe asaj lindore e kanë kundërshtuar këtë opsion.

Emigrantët vazhdojnë rrugën e tyre nga Greqia, përmes Maqedonisë, Serbisë dhe Hungarisë për në Austri e Gjermani.

Kjo lëvizje ka detyruar qeverinë në Vjenë që të dërgojë forcat e armatosura për kontrolle më të rrepta në kufi me Hungarinë, ku rreth 14 mijë klandestinë kaluan kufirin vetëm të djelën.

Rreth 1 mijë prej tyre fjetën në stacionin e trenit të Salzburgut, pasi shërbimi hekurudhor nga Austria për në Gjermani u ndërpre përkohësisht.

/ Top Channel

Titulli: Emigrantët rrezikojnë “status kuonë”; Austria dërgon ushtrinë në kufi

Papa Francesku: Sfida më e madhe e kontinentit? Të kthehet në Nënën Europë



“Sfida më e madhe e kontinentit është që të kthehet në Nënën Europë”. Kështu e shikon Papa Francesku çështjen e emigrantëve në një moment kur në Gjermani janë mbledhur të hënën ministrat e vendeve të unionit për të biseduar mbi ndarjen nëpër shtetet respektive të 160.000 emigrantëve, pas valës së rreth 500.000 prej tyre, zbarkuar në brigjet e Mesdheut kryesisht nga vendet e luftës.

Gjatë një interviste dhënë për një radio portugeze, kreu i Vatikanit u shpreh se me të drejtë, aty ku gjendet një vend i lirë, njerëzit kërkojnë ta plotësojnë. E njëjta gjë po ndodh me ardhjen e emigrantëve në Europë, shtoi ai, të cilët po vijnë të mbushin vendet bosh nga moslindja e fëmijëve.

E në çështjen e plakjes se kontinentit të vjetër, Papa Francesku solli në vëmendje edhe vendin tonë, duke thënë se Shqipëria më ka bërë përshtypje pasi atje mosha mesatare është 40-45 vjeç ashtu sikurse edhe Bosnje Hercegovina që thënë ndryshe janë vende të cilat u rindërtuan pas një lufte. Në Europë e mbyll Papa fjalën e tij, janë të pakta vendet që kane moshë mesatare të ulët dhe kjo gjë duhet të shikohet si shqetësim duke lënë të kuptohet se emigrantët falë lindjeve të mëdha do ta ndihmonin kontinentin plak të merrte veten.

I njëjti paralajmërim erdhi edhe nga një studim i Agjencisë Bloomberg javën që shkoi, i cili solli në vëmendje faktin se për të shpëtuar Europën nga një krizë ekonomiko-financiare, filluar nga fondi i pensioneve, deri në vitin 2060, duhet të pranoheshin 250 milion refugjatë.

/ Top Channel