Vlorë, ndërpritet votimi në dy qendra

Vlora nuk ka qenë shumë e qetë në ditën e sotme të votimit. Gazetarja Anila Peçi raporton se ka pasur një ndërprerje të votimit në dy prej qendrave të vendosura në shkollën e muzikës "Naim Frashëri" në qytet për shkak se votuesit janë ankuar se nuk kanë privatësi. Pas mbërritjes së kreut të KZAZ 61 Edmond Banushi, njëra nga qendrat është transferuar në një prej klasave të shkollës dhe më pas procesi i votimit ka rivijuar.
Ndërkohë kreu aktual Shpëtim Gjika është paraqitur te shkolla "Marigo Pozio" ku mësohet se ishin vendosur përfaqësues të strukturave të PD-së me lista në duar. Ka pasur tension dhe presion kundrejt votuesve, ndërkohë që Gjika u ka kërkuar përfaqësuesve të PD-së të largohen nga qendra e votimit. Fillimisht janë mbledhur militantë të të dyja palëve, por më pas ata janë larguar pa shkaktuar probleme.


Proces normal në Sarandë
Ka nisur normalisht procesi i votimit Sarandë. Sipas korrespondentit të "Shekullit", Ermir Hoxha, po vijon procesi në të gjitha qendrat e votimit në komuna dhe bashki, ndërkohë që është vënë re pjesëmarrje e lartë e votueseve, madje në disa qendra qytetarët po presin në radhë për të votuar.
Ndërkohë në Mesopotam të bashkisë Delvinë nuk janë paraqitur kryetari dhe nënkryetari i komisionit dhe KZAZ ka dërguar dy komisionerë për t'i zëvendësuar. Procesi ka nisur me vonesë.

Shekulli