Kanë protestuar prej javësh për të kërkuar të drejtat e tyre, madje edhe duke marrë vendimin drastik për të hyrë në grevë urie. Por zëri i tyre pak është dëgjuar nga instancat që kanë në dorë fatin e tyre.
Bëhet fjalë për banorët e Zharrëzës në Fier, të cilët u futën në grevë urie për një problem të hershëm që s’i kanë gjetur zgjidhje: Atë më kompaninë e nxjerrjes së naftës “Bankers Petroleum”. Banesat e tyre janë të shkatërruara për shkak të shpërthimeve në puse në këtë zonë, aq sa të japin përshtypjen se Zharrëza është e pushtuar nga tërmetet!
Jo vetëm kaq, ajri i ndotur ka sëmurur shumë prej banorëve të këtij fshati. Këtë të mërkurë ata kanë marrë një vendim që pa frikë mund të konsiderohet historik. Grevistët kanë marrë në këmbë rrugën drejt Tiranës. Me bindjen se askush nga qeveria deri më tani nuk i dëgjoi kërkesat e tyre, ata kanë marrë këtë rrugëtim të lodhshëm për t’ju bashkuar protestës së opozitës, në çadrën që është ngritur para kryeministrisë.
Deri në orët e pasdites, grevistët të cilët shumica janë në karroca dhe po shtyhen prej personave më të rinj e të fuqishëm, kanë mbërritur në Lushnje. Për shkak të lodhjes fizike pasi udhëtuan për orë me radhë me këmbë, ata do të flenë në tenda në Lushnje, ndërsa nesër do të vijojnë marshimin drejt kryeqytetit
“Të rraskapitur mbas 45 km marshim në këmbë maratonomakët e Zharrzës sapo hynë ne Lushnje. Respekt pa fund për këta njerëz dhe të gjithë ata që u bashkuan rrugës”, shkruan Nisma Thurje e cila ka shpërndarë edhe video nga rrugëtimi i tyre.
Të shumtë kanë qenë qytetarët dhe pjesëtarë të shoqërisë civile të cilët e kanë përkrahur iniciativën e tyre të vështirë duke i vlerësuar në rrjetet sociale, si heronj.
Ndërkohë, për çështjen Bankers, kryeprokurori Adriatik Llalla bëri të ditur gjatë ditës së djeshme se kanë rinisur hetimet.
Express