Fotoja e një gruaje të moshuar që shet barishte ndërkohë që po lexon një libër, po shpërndahet nga shumë persona në rrjetet sociale.
Ajo u publikua fillimisht nga Bislim Ahmetaj në faqen e tij në “Facebook”, disa ditë më parë. Gruaja mbetet ende e panjohur por historia e jetës së saj vlen mijëra fjalë.
Ajo që dimë është se kjo nënë po shet barishte në një trotuar të Tiranës dhe po lexon librin e shkruar nga i biri që jeton prej 15 vjetësh në Kanada.
“Filozofia që përcjell kjo foto vlen shumë më tepër se reforma në drejtësi, vlen njëmijë herë më shumë se të gjitha fjalimet që mbajnë udhëheqësit politikë të enjten në parlament, apo gjatë gjithë javës nëpër tribuna të ndryshme. U emocionova aq shumë kur e pashë këtë nënë të ulur mbi një gur, me katër-pesë duar barishte përpara, po lexonte një libër. Ju afrova dhe i kërkova leje ta fotografoj. Ajo më tha : Jo të keqen nana se ju na i qitni në internet fotografitë e masanej vinë policat e s'na lanë me shitë. Kur e pyeta se çfarë libri po lexonte. Ajo mu përgjigj me një ofshamë dhimbjeje që i doli nga thellësia e shpirtit: E ka shkruar im bir që jeton tash 15 vite në Kanada... Më la pa fjalë, doja t'ia blija të gjitha barishtet që kishte shtruar mbi trotuar por për fat të keq isha nisur për një takim dhe koha s'ishte me mua...shpresoj ta shoh prapë dhe t’ia blej atë metër katror me barishte në trotuarin pronë e pushtetit dhe jo e publikut”, shkruan Ahmetaj.
/Shekulli Online
