PS sot zgjedhjet për kryetarin, bojkot kundërshtarët e Ramës
Socialistët në të gjithë vendin sot do të votojnë për kryetarin e ri. Në 400 qendra votimi në të gjitha rrethet e vendit anëtarësia e partisë më të madhe në opozitë, do të zgjedhë midis dy kandidaturave atë të Maqo Lakrorit dhe Edi Ramës. Votimet bëhen sipas parimit një anëtar një votë ndërsa pritet që të bojkotojnë këtë proces zgjedhor brenda partisë, kundërshtarët e kryetarit aktual Edi Rama. Qendrat janë hapur në ora 08.00 dhe do të qendrojnë të hapura deri në orën 16.00. Ndërsa rezultati që do të dalë nga Komisioni i Zgjedhjeve në parti, në komunikim të vazhdueshëm me mediat.
Por, zgjedhjet e sotme do të bojkotohen nga një pjesë e tyre, që nga ish-kryetari Fatos Nano apo deputetët e tjerë kundërshtarë. Ben Blushi e deklaroi dy ditë më parë gjatë një interviste televizive se, “në këto zgjedhje unë nuk marr pjesë si votues”. “Nuk kam asnjë alternativë e cila më bind, për fat të keq, për më tepër askush nuk më kërkoi të votoj për një humbës. I them gjithë socialistëve sot se nuk kanë arsye të votojnë për një njeri i cili ka humbur zgjedhjet. Ata socialistë që shkojnë në 26 shtator për ta zgjedhur Edi Ramën si kryetar të PS-së duhet ta dinë se po votojnë për një njeri që ka humbur zgjedhjet”, - tha Blushi. Ndërsa Fatos Nano deklaroi gjatë emisionit Opininion të gazetarit Blendi Fevziu se nuk do të shkojë të votojë, por u bëri thirrje socialistëve që në fletën e votimit të shkruajnë “Jo bojkotit”.
B:TvKlan
