Love
βeℓℓe â๓e
- Takimet me prindër janë një ditë me ankth si për prindërit ashtu edhe për mësuesit, por ankesat jo gjithnjë duhet të tingëllojnë aq kërcënuese
Marrëdhënia prindër-mësues është shumë e ndërlikuar në disa raste. Kjo, sepse nuk është një lidhje e drejtpërdrejtë, por një raport që kalon përmes fëmijës, që është shpesh i paqëndrueshëm në mënyrën e sjelljes.
Ja çfarë nuk duhet t’i thoni kurrë mësueses së fëmijës suaj.
1. Fëmija im thotë se ju nuk i jepni kohë të mjaftueshme për të mbaruar provimin, cili është justifikimi juaj?
Parashtrimi i ankesës në këtë lloj mënyre dhe kërkimi i një justifikimi nga ana e mësueses mund të duket një përafrim diplomatik, por për arsimtaren ky mund të duket një sulm i hapur. Përpiquni të mos i vini përballë dy anë jo të barabarta të një historie. Mund t’i kërkoni mësueses një ide se përse fëmija juaj e sheh kaq të vështirë atë test.
2. Fëmija është problematik, sepse mërzitet gjatë qëndrimit në klasë.
Mësuesit e kalojnë të gjithë jetën dhe kohën e tyre duke u përpjekur që ta bëjnë shkollën më interesante, një deklaratë e tillë nga ana juaj do t’i hidhte poshtë të gjitha ëndrrat e tyre. Duhet shtuar që, kur thuhet se qëndrimi në klasë është i mërzitshëm për një fëmijë, kjo nënkupton që mësuesja nuk po e bën siç duhet punën e saj. Për t’u shprehur më mirë mund të thoni se fëmija juaj po kërkon më shumë sfida që t’i tërheqin vëmendjen.
3. Fëmija im nuk do të më gënjente kurrë.
Besimi i verbër te fëmija është një thikë me dy presa. Nuk përjashtohet mundësia që mësuesja të jetë gabuar, por ama duhet ta dini se fëmijët në shkollë janë më të ndryshëm sesa hiqen në shtëpi. Për këtë arsye përpiquni ta shmangni besimin e tepërt te fëmija juaj dhe fjalitë që e shprehin këtë përpara mësueses.
4. Do të shkojmë për pushime, mund t’ia jepni detyrat fëmijës tim që të mos ngelë mbrapa?
Në parim kjo frazë nuk ka asgjë të keqe, por thellë-thellë ju po i kërkoni një mësueseje të mirinformuar që t’i zëvendësojë shpjegimet e saj me disa ushtrime dhe këshilla të lehta. Në vend të kësaj, kërkojini mësueses që t’ju japë numrin e kapitujve që do të shpjegojë teksa ju do të jeni me pushime.
5. Fëmija im nuk e pëlqen lëndën tuaj, por po e regjistroj, sepse i duhen kreditet.
Ju mund të keni një ide të qartë se ku mund të ndrisë dhe ku mund të mos jetë i zoti fëmija juaj, por ama sinqeriteti i tepërt nuk është ndonjë gjë shumë e pëlqyeshme për një mësuese. Asnjë arsimtar nuk do të dëshironte që një fëmijë të ishte i detyruar të ndiqte mësimet e tij për arsye të tjera, jashtë dëshirës personale. Në këtë rast, kursejani mësueses të dhënat e tepërta.
6. Përse i jepni kaq shumë detyra shtëpie?
Mund të ndodhë që fëmija juaj të qëndrojë deri vonë duke bërë detyrat e shtëpisë për të njëjtën lëndë gjatë gjithë javës. Ndaj natyrisht e para gjë që doni të bëni kur shkoni në një takim me prindër është “t’ia tërhiqni veshin” mësueses. Nga ana tjetër, një shprehje e tillë është njëlloj sikur t’i thoni se nuk dini të bëni detyrën tuaj. Mos e bëni të tingëllojë sikur fëmija juaj është i vetmi që nuk ia del, kërkoni një mënyrë tjetër më të zbutur për t’ia thënë.
7. Fëmija im ka shumë veprimtari jashtëshkollore, ai nuk mund t’i plotësojë të gjitha kërkesat e shkollës.
Kur ju shpreheni kështu, tregoni se në majë të hierarkisë së jetës së fëmijës suaj nuk është shkolla, por ndonjë kurs futbolli, i gjuhëve të huaja apo aktivitet i ngjashëm. Si një prind i mirë, ju duhet të mësoheni që përparësi t’u jepni aktiviteteve shkollore dhe pastaj dëshirat e tjera të fëmijës. Sigurohuni që nuk jeni duke e mbingarkuar fëmijën tuaj me detaje të parëndësishme.
8. Përse i keni vënë këtë notë?
Takimi me prindër mund të duket si vendi i përshtatshëm për të diskutuar çdo shqetësim tuajin, por një mësuese mund të ketë më shumë se 100 nxënës. Vërtet mendoni se ajo do të mbajë mend rastin e veçantë të fëmijës suaj dhe t’ju thotë të gjitha gabimet që kishte bërë në test? E mira e të mirave është që t’ia jepni një pjesë të përgjegjësisë fëmijës suaj dhe të përpiqeni që ta inkurajoni mësuesen, duke i kërkuar sesi fëmija juaj mund të përmirësohet në lëndën e saj.
9. Fëmija im nuk ka asnjë përgjegjësi për talljet që u bën fëmijëve të tjerë.
Asnjë prind nuk do ta besojë se fëmija e tij po sillet keq me fëmijët e tjerë, kështu që kur mësuesja e nxjerr këtë temë, gjithnjë ekziston mundësia që prindi t’i refuzojë përgjegjësitë. Në vend të kësaj, bëni një bisedë të gjatë me fëmijën tuaj dhe tregojini se të gjithë janë të barabartë dhe se askush nuk meriton të keqtrajtohet.
10. Fola me drejtorin për veprimet tuaja dhe ai më tha të këshillohem më parë me ju.
Nëse po kërkoni të mërzisni një mësuese, kjo është mënyra e duhur. Nuk ka asgjë më të mërzitshme sesa të ankoheni më parë te shefi i saj dhe pastaj ta sillni çështjen në vëmendjen e mësueses. Ankesat në drejtori mund të jenë e vetmja mundësi nëse nuk e simpatizoni shumë një mësuese, por përgjithësisht do të përfundoni duke biseduar me të për çështjen që ju shqetëson, ndaj është më mirë t’i drejtoheni që në fillim.
G.Shqip
