eGo0sTyle
System Engineer
Regjistrimi i popullsisë në bazë etnike dhe fetare do të nisë në muajin tetor dhe cilido shtetas shqiptar që jep informacion të gabuar do të gjobitet.Kjo pritet të zyrtarizohet sot me një vendim të Kuvendit, i cili ka përcaktuar në rendin e ditës një pikë për miratimin me procedurë të përshpejtuar të një projektligji. Më pak fjalë, nëse ndonjë shtetas gënjen për kombësinë apo fenë e tij, apo për çdo lloj informacioni tjetër, gjobitet me 100 mijë lekë. Bëhet fjalë për një projektligj që mban datën 21 qershor dhe është paraqitur në Kuvend nga ministri i Inovacionit, Genc Pollo, i cili, në 20 nene të tij parashikon nisjen e procedurave për regjistrimin e popullsisë. Kjo nismë e maxhorancës pritet të nxitë një debat jo vetëm për përmbajtjen dhe formën e projektligjit, por edhe për mënyrën e miratimit të tij. Krejt papritur ai paraqitet në Kuvend dhe vendoset që të miratohet me procedurë të përshpejtuar. Ndryshe nga procedura e zakonshme, me këtë vendim të Kuvendit, projektligji i paraqitur nga ministri Pollo, “Për disa ndryshime në Ligjin Nr. 8669, datë 26.10.2000 ‘Për regjistrimin e përgjithshëm të popullsisë dhe banesave’ të ndryshuar”, do të kalojë përfundimisht në Kuvend në seancën tjetër. Sipas projektligjit, ankimi ndaj një vendimi të INSTAT-it për vendosjen e një gjobe paraqitet në Komisionin Qendror të Censusit brenda 10 ditëve nga data e shpalljes së këtij vendimi. Nga ana tjetër, në Kuvend është dorëzuar edhe një projektligj me mbi 20 mijë firma nga Aleanca Kuq e Zi, e cila kërkon heqjen nga formulari të dy pyetjeve ku kërkohet që qytetarët të tregojnë nëse e duan përkatësinë e tyre etnike dhe fetare.
Projektligji i paraqitur nga Pollo
Neni 1
Në titull dhe kudo në ligj fjala “regjistrim” zëvendësohet me fjalën “census”.
Neni 4
Detyrimi për t’u përgjigjur
Të gjithë personat, me shtetësi shqiptare apo të huaj, si dhe personat pa shtetësi, me përjashtim të personelit diplomatik të akredituar në Shqipëri, të cilët në momentin e censusit ndodhen brenda territorit të Republikës së Shqipërisë, janë të detyruar të japin informacionin e përcaktuar si të detyrueshëm në pyetësorët e censusit të popullsisë dhe të banesave, të miratuar nga Komisioni Qendror i Censusit, në përputhje me shkronjën “e” të nenit 12 të këtij ligji:
a) në mënyrë të plotë;
b) në mënyrë të saktë dhe të besueshme.
Neni 20
Kundërvajtjet
Përbëjnë kundërvajtje administrative dhe dënohen, përkatësisht, me gjobë shkeljet e mëposhtme:
1. Mosdhënia e informacionit në formë të plotë dhe/ose të saktë e të besueshme, të përcaktuar si të detyrueshëm, në përputhje me përcaktimet e shkronjave “a” dhe “b”, të nenit 4 të këtij ligji, nga personi/at përgjegjës dënohet me gjobë prej 100 000 (njëqind mijë) lekësh.
2. Mosrespektimi i rregullave të konfidencialitetit të përcaktuara në nenin 9 të ligjit nga personi/at përgjegjës dënohet me një gjobë prej 10 000 (dhjetë mijë) deri 50 000 (pesëdhjetë mijë) lekë:
3. Mosrespektimi i rregullave të përcaktuara në nenin 19 të këtij ligji nga personi/at përgjegjës dënohet me gjobë nga 15 000 (pesëmbëdhjetë mijë) deri 20 000 (njëzet mijë) lekë.
ERALD KAPRI