Vvetoni
Antarë i Respektuar
Tiranë – Maxhoranca dhe opozita ndodhen më afër se kurrë arritjes së marrëveshjes për zgjidhjen e krizës politike, gati 11 muaj nga përfundimi i zgjedhjeve të 28 qershorit.
Kjo marrëveshje duket më pranë falë ndërhyrjes së komunitetit ndërkombëtar, veçanërisht të ambasadorëve të SHBA-së, BE-së dhe OSBE-së. Pas takimeve me Presidentin Bamir Topi, ambasadorët e KE-së, Spanjës dhe SHBA-së, kanë hartuar një draft, të cilin ia kanë paraqitur të enjten në mbrëmje kryeministrit Sali Berisha dhe kryetarit të opozitës, Edi Rama.
Mësohet se ambasadorët kanë propozuar që hetimi i zgjedhjeve të 28 qershorit të bëhet nëpërmjet hapjes së kutive të materialeve zgjedhore, nëpërmjet krijimit të një komisioni hetimor parlamentar. Dorëzimin e këtij drafti tek krerët e forcave kryesore politike e bëri të ditur dje në mesditë ambasadori i OSBE-së në Tiranë, Robert Bosh, i cili në një gjuhë të prerë i kërkoi partive ta firmosin atë.
Reagimi i partive
Burime pranë dy partive kryesore bëjnë të ditur se Kryeministri Berisha ka pranuar hapjen e kutive të materialeve zgjedhore, por duke iu referuar procedurës së parashikuar në Kodin Zgjedhor. Në nënin 178 të Kodit “ruajtja e dokumentacionit” parashikohet që materialet zgjedhore të ruhen në Arkivën e Shtetit, ndërsa fletët e votimit të digjen.
Por, burime nga Partia Socialiste bëjnë të ditur se kryetari Edi Rama ka ofruar një tjetër mënyrë. Ai bie dakord që komisioni hetimor parlamentar të hetojë zgjedhjet e 28 qershorit, duke hapur kutitë e materialeve zgjedhore, por kutitë e fletëve të votimit të mos digjen. PS propozon që ato të mbeten të ngrira, dhe t’i drejtohet me një kërkesë Gjykatës Kushtetuese dhe Komisionit të Venecias për të marrë nga këto dy institucione një argumentim, nëse hapja e kutive të votimit për zonat ku ka një vendim gjykate bie apo jo ndesh me kushtetutën.
Megjithëse varianti i propozuar nga maxhoranca ka një ndryshim nga ai që mbron opozita, pritet që kompromisi të arrihet shumë shpejt, duke qenë se Kryeministri Berisha është shprehur disa herë se opozita duhet t’i drejtohet Gjykatës Kushtetuese dhe Komisionit të Venecias për s ai përket hapjes së kutive të votimit.