Vendet e zgjedhur për pushime nga politikanët shqiptarë
Berisha-Meta në jug të Shqipërisë, Rama në Shtetet e Bashkuara
Nga data 1 gusht politikanët shqiptarë kanë hequr kostumin e përditshëm dhe janë veshur me rroba banje. Thuajse të gjithë, pa përjashtim, janë nisur drejt detit. Aq më tepër që ky ka qenë një nga vitet me aktivitete më të ngjeshura politike për shkak të zgjedhjeve parlamentare. Kryeministri Berisha, i njohur tashmë për intervale shumë të shkurta të pushimeve, ka vendosur që disa ditë t’i kalojë në vilat qeveritare në Vlorë. Pushimet, Berisha i ka shfrytëzuar dhe për inaugurime. Ditën e djeshme inauguroi disa rrugë në bregdet. Kreu i opozitës është nisur për në SHBA, ku këtë herë pushimet do t’i ndërthurë me politikë. Ndryshe nga vitet e tjera ku Rama ka preferuar t’i kalonte në Vjenë, këtë verë do të jetë përtej oqeanit. Ilir Meta ka zgjedhur Dhërmiun si vend për të pushuar këtë verë.
Berisha-Rama-Meta
Drejtuesit e tre partive kryesore në vend kanë zgjedhur destinacione të ndryshme për të kaluar pushimet. Pas një fushate stërmunduese, Berisha i kalon ditët e pushimeve së bashku me bashkëshorten në jugun e vendit. Fundjavën kryeministri e kaloi në vilën qeveritare në Vlorë. Kreu i opozitës këtë vit duket se do të ketë pushime të dyzuara mes qejfit dhe punës. Prej disa ditësh, Rama është nisur në drejtim të Shteteve të Bashkuara për të takuar familjarë të tij, por gjithashtu është duke zhvilluar takime me autoritete të njohura për të denoncuar shkeljet sipas tij, që kanë ndodhën në zgjedhjet e 28 qershorit. Kreu i Lëvizjes Socialiste për Integrim, Ilir Meta, është në Dhërmi së bashku me bashkëshorten dhe fëmijët. Kreu i LSI është në ditët e fundit të pushimeve, pasi shumë shpejt do të jetë në Tiranë për të nisur negociatat me kryeministrin për Qeverinë e re, e cila do të dalë nga koalicioni PD-LSI.
Deputetët
Të gjithë deputetët e Parlamentit të ri janë nisur për pushime. Berisha dhe Rama u kanë dhënë vartësve të tyre dhjetë ditë të plota, që të rrinë pranë familjarëve në pushimet e verës. Në Partinë Socialiste zyrat janë thuajse të zbrazura. Vetëm Arta Dade, e cila është kthyer nga pushimet, është parë të hyjë dhe të dalë nga selia rozë. Po ashtu, dhe deputeti i Librazhdit Taulant Balla, i ka shtyrë pushimet deri sa të kthehen deputetët e tjerë.
Në PD deputetët e rinj kanë lënë selinë deri në datën 15 gusht, duke bërë që korridoret e selisë blu të jenë bosh si rrallëherë.
Sali Berisha
Kryeministri Berisha, i njohur tashmë për intervale shumë të shkurta të pushimeve, ka vendosur që disa ditë t’i kalojë në vilat qeveritare në Vlorë. Kreu i selisë blu i kalon pushimet duke lexuar.
Edi Rama
Prej disa ditësh Rama është nisur në drejtim të Shteteve të Bashkuara për të takuar familjarë të tij, por gjithashtu është duke zhvilluar takime me autoritet të njohura për të denoncuar shkeljet sipas tij që kanë ndodhur në zgjedhje.
Ilir Meta
Kreu i Lëvizjes Socialiste për Integrim, Ilir Meta, është në Dhërmi së bashku me bashkëshorten dhe fëmijët. Kreu i LSI është në ditët e fundit të pushimeve, pasi shumë shpejt do të jetë në Tiranë për të nisur negociatt me kryeministrin për Qeverinë e re, e cila do të dalë nga koalicioni PD-LSI.
Arben Malaj
Kandidati për kryetar i Partisë Socialiste është duke bërë pushime me mendjen tek Kongresi. Para pak ditësh, Malaj ishte në Itali me familjen dhe prej andej komunikonte me median lidhur me qëndrimet e tij për situatën politike në vend.
Ben Blushi
Një tjetër rival i Edi Ramës, pushimet duket se do t’i të bëjë të copëzuara. Pak ditë më parë, Blushi ka qenë në Greqi në shoqërinë e bashkëshortes dhe miqve të tyre. Momentalisht Blushi ndodhet në Tiranë dhe shfrytëzon kryesisht fundjavat për të pushuar.
Rudina Seseri
Deputetja e sapo zgjedhur e Partisë Socialiste do t’i kalojë pushimet e saj në Shtetet e Bashkuara të Amerikës. Pres disa ditësh Seseri është nisur nga Rinasi për në SHBA ,ku do të jetë së bashku me familjarë të saj.
TO